മനസ്സാണ് ജഗത്ത്

മനസ്സ് ദൃക്കിന്റെ അഥവാ ജ്ഞാതാവിന്റെ സങ്കല്പകേന്ദ്രമാകുന്നു.  അല്പമായ അഗ്നിയില്‍ ഇന്ധനം കൂടുതലായി ഇട്ടുകൊടുത്താല്‍ തീ ആളിക്കത്തി പ്രകാശവും ചൂടും ഏറെ പരത്തുന്നതുപോലെ ബ്രഹ്മത്തിന്റെ സ്ഫുരണം സാന്ദ്രമായ സങ്കല്പത്താല്‍ അഹന്തയായി പരിണമിക്കുന്നു.  ആ അഹങ്കാരം ചേതസ്സ്, ചിത്തം, മനം, മായാ, പ്രകൃതി എന്നീ പേരുകളുള്ളവസ്തുക്കളായി ഭവിക്കുന്നു.  ഇപ്രകാരം പരബ്രഹ്മത്തില്‍നിന്ന് മനസ്സ് ഉണ്ടായിവന്നു.  മനനാത്മകമായ ശക്തിയുടെ പൂര്‍ണതയില്‍ മനസ്സ് ഈ ജഗത്തിനെ സൃഷ്ടിച്ചു (യോഗവാസിഷ്ഠം).  സകലതിന്റെയും അസ്തിത്വം മനസ്സിന്റെ ബന്ധംകൊണ്ട് അഥവാ സാന്നിദ്ധ്യംകൊണ്ടേ ഉണ്ടാകുന്നുള്ളു.  മനസ്സും കാളിയുടെ സൂക്ഷ്മശക്തിയില്‍നിന്ന് സംജാതമായ ഇന്ദ്രിയമാണെന്നും ഓര്‍ക്കുക. മഹോപനിഷത്തില്‍ ഇങ്ങനെ പറയുന്നു:-

മനോവിലാസഃ സംസാര 

ഇതി മേ നിശ്ചിതാ മതിഃ

സര്‍വശക്തേര്‍ മഹേശസ്യ

വിലാസോഹി മനോജഗത്

സാരം- ഈ സംസാരമാകട്ടെ മനോവിലാസമാണെന്നത് നിശ്ചയമാണ്. സര്‍വശക്തനായ മഹേശന്റെ മനോവിലാസം തന്നെയാണ് ജഗത്ത്.  അതേ ഉപനിഷത്തില്‍നിന്ന്-

ബ്രഹ്മണാദന്യതേ വിശ്വം 

മനസൈവ സ്വയംഭുവാ

മനോമയമതോവിശ്വം 

യന്നാമ പരിദൃശ്യതേ.

സാരം-സ്വയംഭൂവായിരിക്കുന്ന ബ്രഹ്മത്തിനാല്‍ മനസ്സുകൊണ്ട് ഉണ്ടാക്കപ്പെട്ടതാണ് ഈ വിശ്വം.നാം കാണുന്ന വിശ്വമെല്ലാം മനോമയം മാത്രമാണ്.

                                                                                                             9497225961