ന്യുദല്ഹി: ഭാരതത്തില് ഇ-സിഗരറ്റുകളുടെ വില്പ്പനയും ഉപയോഗത്തിനും കേന്ദ്ര സര്ക്കാരിന്റെ നിരോധനം. ബുധനാഴ്ച്ച ചേര്ന്ന മന്ത്രിസഭാ യോഗമാണ് നിരോധനം ഏര്പ്പെടുത്തിക്കൊണ്ട് തീരുമാനമെടുത്തത്. ഇതനുസരിച്ച് ഇ-സിഗരറ്റ് നിര്മാണം, ഇറക്കുമതി/കയറ്റുമതി, കൈമാറ്റം, വില്പ്പന, വിതരണം, സംഭരണം, ഇവയുടെ പരസ്യപ്പെടുത്തല് എന്നിവ നിരോധിക്കുന്നതായി കേന്ദ്രധനമന്ത്രി നിര്മ്മല സീതാരാമന് വിളിച്ചു ചേര്ത്ത വാര്ത്തസമ്മേളനത്തില് അറിയിച്ചു.
സ്കൂള് വിദ്യാര്ത്ഥികളും യുവാക്കളും അടക്കം വ്യാപകമായി ഉപയോഗിക്കുന്നു എന്ന കണ്ടെത്തലിന്റെ അടിസ്ഥാനത്തിലാണ് ഇ സിഗരറ്റുകള് നിരോധിക്കാന് തീരുമാനിച്ചതെന്ന് കേന്ദ്ര സര്ക്കാര് വിശദീകരിച്ചു. വലിയ ആരോഗ്യപ്രശ്നങ്ങളാണ് ഇ സിഗരറ്റ് ഉണ്ടാക്കുന്നത്.
ഇതു കൂടാതെ ഇ സിഗരറ്റ് നിരോധനത്തിന് പ്രത്യേക ഓഡിനന്സ് കൊണ്ടുവരാനും തീരുമാനിച്ചിട്ടുണ്ട്. ഇതിനായി മന്ത്രിതല ഉപസമിതിയേയും ചുമതലപ്പെടുത്തി. ഓര്ഡിനന്സ് പ്രകാരം നിരോധനം ലംഘിക്കുന്നവര്ക്ക് ഒരു വര്ഷം തടവും ഒരു ലക്ഷം രൂപ പിഴയും വരെ ശിക്ഷ ലഭിക്കും.
ഇ-സിഗരറ്റുകള്, ഹീറ്റ് നോട്ട് ബേണ് സ്മോക്കിങ് ഡിവൈസുകള്, ഇ- നിക്കോട്ടിന് ഫ്ളേവേര്ഡ് ഹുക്കകള് തുടങ്ങിയ നിരോധിക്കുന്നതിന് മുന്ഗണന നല്കുമെന്ന് രണ്ടാം നരേന്ദ്രമോദി സര്ക്കാരിന്റെ ആദ്യ നൂറുദിന അജണ്ടയില് വ്യക്തമാക്കിയിരുന്നു.
