തിരുവനന്തപുരം: ലൈഫ് ഭവന പദ്ധതിപ്രകാരം പാറശ്ശാല പഞ്ചായത്ത് പുറത്തിറക്കിയ ഗുണഭോക്താക്കളുടെ ലിസ്റ്റില് ഗുരുതരമായ പിഴവ്. ഇതിനെത്തുടര്ന്ന് ഉണ്ടായിരുന്ന വീടുപോലും നഷ്ടപ്പെട്ടവരുള്പ്പെടെ മുപ്പതോളംപേരുടെ ഭവനനിര്മാണ പ്രവര്ത്തനങ്ങള് തുടക്കത്തിലേ നിലച്ചു.
സ്വന്തമായി ഭൂമിയുള്ള ഭവനരഹിതര്, ഭൂമിയും വീടുമില്ലാത്തവര് എന്നിങ്ങനെ രണ്ടു വിഭാഗങ്ങളായാണ് ഗുണഭോക്തൃപട്ടിക തയാറാക്കിയിട്ടുള്ളത്. ഇത്തരത്തില് ലിസ്റ്റ് തയ്യാറാക്കുന്നതില് വന്ന പിശകാണ് നിരാലംബരായ നിരവധിപേരെ നിവൃത്തികേടിലാക്കിയത്.
ഭൂമിയുള്ളവര്ക്കാണ് ആദ്യഘട്ടത്തില് വീടുകള് അനുവദിച്ചത്. എന്നാല് സ്വന്തമായി ഭൂമിയുള്ള ഏകദേശം മുപ്പതോളം വീട്ടുകാര് ഭൂമിയില്ലാത്തവരുടെ പട്ടികയിലാണ് ഉള്പ്പെട്ടിട്ടുള്ളത്. ലിസ്റ്റിലെ അവ്യക്തത നിലനില്ക്കെ ഇവര്ക്ക് പഞ്ചായത്തു വിഹിതമായ നാല്പ്പതിനായിരം രൂപ കൈമാറുകയും ചെയ്തു. ഗുണഭോക്തൃലിസ്റ്റിലെ പിഴവ് പരിഹരിച്ചാല് മാത്രമെ തുടര്ഗഡുക്കള് ലഭിക്കൂ എന്നതാണ് നിലവിലെ സ്ഥിതി. ഒമ്പതു മാസങ്ങള്ക്കുമുമ്പ് ആദ്യ ഗഡു കൈപ്പറ്റുന്നതിനു മുമ്പായി ഇക്കാര്യം അധികൃതരുടെ ശ്രദ്ധയില്പ്പെടുത്തിയിട്ടും നാളിതുവരെ ലിസ്റ്റ് ക്രമപ്പെടുത്താത്തതാണ് ഭവനനിര്മാണ പ്രവര്ത്തനങ്ങള് നിലയ്ക്കാനുള്ള കാരണം.
പഞ്ചായത്തധികൃതരുടെ ഉറപ്പിന്മേല് വീടുപണി തുടങ്ങിയ ഇവരില് പലരും ടാര്പോളിന് കൊണ്ടുമറച്ച ഷെഡിലാണ് ഒമ്പതു മാസത്തോളമായി കഴിയുന്നത്. വേനല്ച്ചൂടില് വിയര്ത്തൊലിച്ചും മഴക്കാലത്ത് ചോര്ന്നു നനഞ്ഞും വിധിയെപ്പഴിച്ചു കഴിയുകയാണിവര്. ബേസ്മെന്റ് വരെയെത്തിയ വീടുപണി എന്നു പുനഃരാരംഭിക്കാം എന്നതിന് അധികൃതര്ക്കും ഉത്തരമില്ല.
പ്രാദേശിക രാഷ്ട്രീയ നേതൃത്വങ്ങളും ഇക്കാര്യം കണ്ടതായി ഭാവിക്കുന്നില്ല. അനുകൂല നടപടികള്ക്കായി ജില്ലാ കളക്ടറെ സമീപിക്കാനിരിക്കയാണ് ഇവരില് പലരും.
