പത്തനംതിട്ട: റാന്നി സെന്റ് തോമസ് കോളജ് പ്രിന്സിപ്പലിനെ സര്വീസില് നിന്ന് സസ്പെന്ഡ് ചെയ്ത കോളജ് മാനേജരുടെ നടപടി ഹൈക്കോടതി റദ്ദാക്കി. ബാലിശമായ കാരണങ്ങളാല് നല്കിയ സസ്പെന്ഷന് നീതീകരിക്കാനാവില്ലെന്നും പ്രിന്സിപ്പലിന് പ്രവര്ത്തന സ്വാതന്ത്ര്യം അനുവദിക്കണമെന്നും സിംഗിള്ബെഞ്ചിന്റെ വിധിയില് പറയുന്നു.
മാനേജര് തുടര്ച്ചയായി മെമ്മോകളും ഷോകോസ് നോട്ടീസും നല്കി ഉപദ്രവിക്കുകയാണെന്നാരോപിച്ച് പ്രിന്സിപ്പല് ഡോ.ലത മറീന വര്ഗ്ഗീസ് നല്കിയ ഹര്ജി ഹൈക്കോടതിയുടെ പരിഗണനയിലിരിക്കെ 2018 ജൂണ് 25ന് ഇവരെ മാനേജര് ഡോ. എബ്രഹാം. വി. കുര്യാക്കോസ് സസ്പെന്ഡ് ചെയ്തിരുന്നു. തുടര്ന്ന് ഹര്ജിക്കാരി നല്കിയ ഉപഹര്ജിയില് സസ്പെന്ഷന് സിംഗിള്ബെഞ്ച് സ്റ്റേ ചെയ്തു. പിന്നീട് ഹര്ജിയില് വിശദമായി വാദം കേട്ടാണ് പ്രിന്സിപ്പലിന്റെ സസ്പെന്ഷന് ഹൈക്കോടതി റദ്ദാക്കിയത്. പ്രിന്സിപ്പലിനെതിരെ നടപടി തുടരാന് മാനേജ്മെന്റ് തീരുമാനിച്ചിട്ടുണ്ടെങ്കില് നിയമപരമായ നടപടിക്രമങ്ങള് പാലിച്ചും പ്രിന്സിപ്പലിന് മറുപടിക്ക് അവസരം നല്കിയും വേണമെന്ന് സിംഗിള്ബെഞ്ച് വ്യക്തമാക്കി. ഇത്തരമൊരു നടപടി സ്വീകരിക്കുന്നുണ്ടെങ്കില് മൂന്നു മാസത്തിനുള്ളില് വേണമെന്നും വിധിയില് പറയുന്നു. ഒരു മതത്തിലെ തന്നെ രണ്ട് സമുദായങ്ങളുടെ പേരില് പോരടിക്കാന് ഇവര് ഒരു വിദ്യാഭ്യാസ സ്ഥാപനത്തെ ഉപയോഗിക്കുന്നത് ദൗര്ഭാഗ്യകരമാണെന്ന് കോടതി ചൂണ്ടിക്കാട്ടി.
പ്രിന്സിപ്പലിന്റെ ഓരോ നീക്കവും പരിശോധിക്കുകയാണ് മാനേജരെന്ന് മെമ്മോകള് പരിശോധിച്ചാല് വ്യക്തമാകും. പ്രിന്സിപ്പലിനെതിരെ നിയമപരമായി നടപടിയെടുക്കാന് മാനേജര്ക്ക് അധികാരമുണ്ട്. എന്നാല് ദിനംപ്രതി മെമ്മോ നല്കി അവരെ സമ്മര്ദ്ദത്തിലാക്കാന് അധികാരമില്ല. കോളജില് നിന്ന് പുറത്താക്കാനുള്ള നീക്കമാണെന്ന പ്രിന്സിപ്പലിന്റെ വാദം ഗൗരവമര്ഹിക്കുന്നുവെന്നും ഹൈക്കോടതി പറഞ്ഞു. ക്നാനായ വിഭാഗത്തില്പെട്ട റാന്നി സെന്റ് തോമസ് വലിയപള്ളിയുടെ മാനേജ്മെന്റിലുള്ളതാണ് കോളജ്. ഇവിടെ ഓര്ത്തഡോക്സ് വിഭാഗക്കാരിയായ ഹര്ജിക്കാരി പ്രിന്സിപ്പിലായി ചുമതല ഏറ്റെടുത്തതാണ് യഥാര്ത്ഥ പ്രശ്നമെന്നാണ് ഹര്ജിക്കാരിയുടെ വാദം. ഓര്ത്തഡോക്സ് സഭാംഗമായ തന്നെ പുറത്താക്കുമെന്ന് പ്രചരണം നടത്തിയാണ് മുന് പ്രിന്സിപ്പല് കൂടിയായ ഡോ. എബ്രഹാം മാനേജര് പദവിയില് എത്തിയത്. അനാവശ്യകാര്യങ്ങള്ക്കു തുടര്ച്ചയായി മെമ്മോ നല്കി ഉപദ്രവിച്ചു. മാനേജര് ചുമതലയേറ്റെടുത്ത അന്നു തന്നെ തന്റെ നിയമനം പുന:പരിശോധിക്കണമെന്നാവശ്യപ്പെട്ട് എംജി സര്വകലാശാലക്ക് കത്തെഴുതി. പ്രിന്സിപ്പലിന്റെ മുറിയില് സിസിടിവി സ്ഥാപിച്ച് നിരീക്ഷണം ഏര്പ്പെടുത്തി.
ഗവേണിംഗ് ബോര്ഡിന്റെ സെക്രട്ടറിയായിട്ടും യോഗ മിനുട്സ് കാണാനോ ഒപ്പു വെക്കാനോ അനുവദിക്കുന്നില്ല. അവധി ദിനങ്ങളില് ചുമതല കൈമാറിയ നടപടി പോലും ചോദ്യം ചെയ്ത് മാനേജര് മെമ്മോ നല്കി. ഹെഡ് അക്കൗണ്ടന്റ് മോശമായി പെരുമാറിയതിന് വനിതാ കമ്മിഷന് പരാതി നല്കിയതിനെത്തുടര്ന്നാണ് സസ്പെന്ഡ് ചെയ്തതെന്നും ഹര്ജിയില് പറയുന്നു.
