മുംബൈ: സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന് ബിനോയ് കൊടിയേരിക്കെതിരെയുള്ള പീഡന പരാതിയില് മുംബൈ പോലീസ് അന്വേഷണം പാതിവഴിയില്. ഒളിവിലുള്ള ബിനോയിയെ കണ്ടെത്തി ചോദ്യം ചെയ്താല് മാത്രമേ പോലീസിന് അന്വേഷണം മുന്നോട്ട് കൊണ്ടുപോകാനാകു. ബിനോയ് നല്കിയ മുന്കൂര് ജാമ്യാപേക്ഷയില് കോടതി ഉത്തരവ് വൈകുന്നതാണ് പോലീസിനെ കുഴക്കുന്നത്.
ഹര്ജിയില് വ്യാഴാഴ്ച ഉത്തരവ് വരും വരെ ബിനോയിയെ അറസ്റ്റ് ചെയ്യേണ്ടെന്നാണ് പോലീസിന്റെ തീരുമാനം. നേരത്തെ ലുക്കൗട്ട് നോട്ടീസിറക്കാന് പോലീസ് നടപടി തുടങ്ങിയിരുന്നെങ്കിലും ബിനോയ് മുന്കൂര് ജാമ്യഹര്ജി നല്കിയതോടെ ഈ തീരുമാനം മരവിപ്പിച്ചു.
യുവതി നല്കിയ ഡിജിറ്റല് തെളിവുകളുടെ ശാസ്ത്രീയ പരിശോധനയും പൂര്ത്തിയാക്കേണ്ടതുണ്ട്. ഇതിനിടയില് പരാതിക്കാരിയുടെ കുടുംബം നിരന്തരം പൊലീസില് സമ്മര്ദ്ദം ചെലുത്തുകയും പുതിയ തെളിവുകള് മാധ്യമങ്ങള്ക്ക് മുന്നിലെത്തിക്കുകയും ചെയ്യുകയാണ്. ഒളിവിലുള്ള ബനോയിയെ കുറിച്ച് ഒരു സൂചനയും പോലീസിന് ലഭിച്ചില്ലെന്നാണ് വിവരം.
അതിനിടെ ബിനോയ് കേരളത്തില് തന്നെയുണ്ടെന്ന് മുംബൈ പോലീസ് സംഘം അറിയിച്ചു. ബിനോയിയെ കണ്ടെത്താന് കേരളാ പോലീസ് സഹകരിക്കുന്നില്ലെന്നും കേരളത്തിലെത്തിയ അന്വേഷണസംഘം മുംബൈ കമ്മീഷണറെ അറിയിച്ചു. ഓഷിവാരയില് നിന്നുള്ള പ്രത്യേക പോലീസ് സംഘമാണ് ബിനോയിയെ തേടി കേരളത്തില് എത്തിയത്.
ബിനോയിയെ തേടി തിരുവനന്തപുരത്ത് മുടവന്മുകളിലെ വീട്ടിലെത്തിയെങ്കിലും കേരള പോലീസ് സഹകരിച്ചില്ല. സിപിഎമ്മിന്റെ കേരളത്തിലെ ആസ്ഥാനമായ എകെജി സെന്ററിനു സമീപത്തെ ഫ്ളാറ്റില് പോകാന് ആദ്യം തീരുമാനിച്ചെങ്കിലും കേരള പൊലീസ് സമ്മതിച്ചില്ല. കേസുമായി തിരുവനന്തപുരം സിറ്റി പോലീസ് സഹകരിക്കുന്നില്ലെന്നും ഓഷിവാര പോലീസിന് പരാതിയുണ്ട്.
ബിനീഷ് മലബാറിലെ പാര്ട്ടി ഗ്രാമത്തില് ഒളിക്കാനാണ് സാധ്യതയെന്നാണ് മുംബൈയില് നിന്നെത്തിയ പോലീസ് പറയുന്നത്. കേരളത്തിന് വെളിയില് പോയാല് പിടികൂടാനുള്ള സാധ്യതയുള്ളതുകൊണ്ട് മലബാറില് തന്നെയുണ്ടെന്ന് ഇവര് മുംബൈ പോലീസിനെ അറിയിച്ചു. യുവതിയുടെ പരാതി ലഭിച്ച് ഒരാഴ്ച തികഞ്ഞിട്ടും ബിനോയ് കോടിയേരി എവിടെയെന്ന് പൊലീസിന് അറിയില്ല സ്ഥിരം പല്ലവിയാണ് കേരള പോലീസ് പറയുന്നത്. ഈ സാഹചര്യത്തില് നാളെ ബിനോയ് കോടിയേരിക്കായി ലുക്ക് ഔട്ട് നോട്ടീസ് പുറപ്പെടുവിക്കാനാണ് തീരുമാനം. ബിനോയിയുടെ മുന്കൂര് ജാമ്യാപേക്ഷ നാളെയാണ് ഓഷിവാര കോടതി പരിഗണിക്കുന്നത്. കോടതിയുടെ തീരുമാനം വരുന്നതിന് മുമ്പുതന്നെ ബിനോയ് കോടിയേരിയെ അറസ്റ്റു ചെയ്യാനാണ് മുംബൈ പോലീസ് ശ്രമിക്കുന്നത്.
