സതാംപ്ടണ്: ലോകകപ്പിലെ ഇന്ത്യ-അഫ്ഗാന് മത്സരം അവസാനിക്കുന്നതിന് മുമ്പ് ‘ഇന്ത്യയ്ക്ക് ഞെട്ടിക്കുന്ന തോല്വി’യെന്ന വ്യാജ വാര്ത്ത നല്കി ഏഷ്യാനെറ്റ് ന്യൂസ്. മത്സരം അവസാനിക്കാന് നാല് പന്ത് ശേഷിക്കെയാണ് ഏഷ്യാനെറ്റ് ഇത്തരം ഒരു വാര്ത്ത നല്കിയത്. അവസാന ഓവറില് മുഹമ്മദ് ഷമിയുടെ മിന്നുന്ന ഹാട്രിക്ക് ഇന്ത്യക്ക് ജയമൊരുക്കിയതോടെയാണ് ചാനല് ഈ ഫ്ളാഷ് പിന്വലിക്കാന് തയാറായത്. ഏഷ്യാനെറ്റ് ഇത്തരമൊരും വ്യാജവാര്ത്ത പുറത്തുവിട്ടതിനെതിരെ സോഷ്യല് മീഡിയയില് വ്യാപക പ്രതിഷേധമാണ് ഉയരുന്നത്.
ടോസ് നേടി ആദ്യം ബാറ്റുചെയ്ത ഇന്ത്യക്ക് എട്ടു വിക്കറ്റ് നഷ്ടത്തില് 224 റണ്സ് എടുത്തിരുന്നു. തുടര്ന്ന് ബാറ്റ് ചെയ്ത അഫ്ഗാന് 49.5 ഓവറില് 213 റണ്സിനാണ് അവര് പുറത്തായി. അവസാന ഓവറില് ജയിക്കാന് 16 റണ്സായിരുന്നു അഫ്ഗാനു വേണ്ടിയിരുന്നത്. ക്രീസില് അര്ധസെഞ്ചുറി നേടിയ മുഹമ്മദ് നബിയും. ഷമി എറിഞ്ഞ ആദ്യ പന്തു തന്നെ ബൗണ്ടറി കടത്തിയിരുന്നു. അടുത്ത പന്തിലും ആഞ്ഞു വീശിയ നബിക്കു പക്ഷേ അതിര്ത്തി കടത്താനായില്ല. പിന്നീടുള്ള മൂന്നു പന്തുകളില് ഷമി അഫ്ഗാന്റെ വിധിയെഴുതി. ആദ്യ പന്തിലേതിനു സമാനമായ ഷോട്ടിനു ശ്രമിച്ച നബി ലോങ്ഓണില് ഹര്ദ്ദിക് പാണ്ഡ്യയുടെ കൈയിലൊതുങ്ങി.
നാലാം പന്തില് അഫ്താബ് ആലത്തിന്റെയും അഞ്ചാം പന്തില് മുജീബ് ഉര് റഹ്മാന്റെയും ഷമി എറിഞ്ഞിട്ട് ഇന്ത്യയ്ക്ക് മിന്നുന്ന ജയം സമ്മാനിച്ചത്. ചേതന് ശര്മയ്ക്കു ശേഷം ലോകകപ്പ് ക്രിക്കറ്റില് ഹാട്രിക് തികയ്ക്കുന്ന ആദ്യ ഇന്ത്യന് താരമായി ഇതോടെ ഷമി. 1987 ലോകകപ്പില് ന്യൂസിലന്ഡിനെതിരേയായിരുന്നു ചേതന് ശര്മയുടെ ഹാട്രിക് പ്രകടനം.
