തിരുവനന്തപുരം: മലയാളത്തിന്റെ പ്രിയപ്പെട്ട എഴുത്തുകാരന് മലയാറ്റൂര് രാമകൃഷ്ണന് സ്മാരകമെന്ന ആവശ്യത്തിന് സര്ക്കാര് അവഗണന. ഒരു പുരുഷായുസു മുഴുവന് മലയാറ്റൂര് ജീവിച്ച കരമന ശാസ്ത്രിനഗറില് സ്മാരകം വേണമെന്ന നാടിന്റെ നിവേദനം ചവറ്റുകൊട്ടയില്.
മലയാറ്റൂര് താമസിച്ചിരുന്ന വൈദേഹി എന്ന വീട് കരമനയില് ഇപ്പോഴുമുണ്ട്. മലയാളിയെ വായനയുടെ വിഹായസിലേക്ക് കൈപിടിച്ചു നടത്തിയ മലയാറ്റൂര് മൂന്നു പതിറ്റാണ്ടിലേറെ താമസിച്ചിരുന്ന വീടാണിത്. രചനകളിലധികവും അദ്ദേഹം വൈദേഹിയില് ഇരുന്നാണ് നടത്തിയിട്ടുള്ളത്. വീട് വിറ്റെങ്കിലും ഈ പ്രദേശത്ത് അദ്ദേഹത്തിന്റെ സ്മരണകള് ഇന്നും നിറഞ്ഞുനില്ക്കുന്നു.
ശാസ്ത്രിനഗറില് മുമ്പ് കളിസ്ഥലമായി ഉപയോഗിച്ചിരുന്ന സര്ക്കാര് പുറമ്പോക്ക് ഇപ്പോള് കാടുമൂടി കിടക്കുന്നു. ഈ മൈതാനത്തിന് മലയാറ്റൂരിന്റെ പേര് നല്കണമെന്ന് ആവശ്യപ്പെട്ട് കൗണ്സിലര് കരമന അജിത് ഉള്പ്പെടെയുള്ളവര് സര്ക്കാരില് അപേക്ഷ നല്കിയിരുന്നു. ഇവിടെ മലയാറ്റൂര് സ്മാരക ഗ്രന്ഥശാലയും പാര്ക്കും സ്ഥാപിക്കുന്നതിന് പദ്ധതി തയാറാക്കാന് നഗരസഭയിലും കരമനഅജിത് പ്രമേയംഅവതരിപ്പിച്ചു. പക്ഷേ,ഫലമുണ്ടായില്ല.
2010ല് അന്നത്തെ റവന്യൂ മന്ത്രി തുടര്നടപടികള്ക്കായി കായികവകുപ്പിന് ഫയല് കൈമാറിയെങ്കിലും പിന്നീട് നടപടിയൊന്നുമുണ്ടായില്ല. പലതവണ സെക്രട്ടേറിയറ്റില് ഇതിനെക്കുറിച്ച് അന്വേഷിക്കുകയും പരാതി നല്കുകയും ചെയ്തിട്ടും ഒന്നും നടന്നില്ലെന്ന് ശാസ്ത്രിനഗര് ഈസ്റ്റ് റസിഡന്റ്സ് അസോസിയേഷന് ഭാരവാഹികളും പറയുന്നു.
കെ.വി.രാമകൃഷ്ണനെന്ന മലയാറ്റൂര് രാമകൃഷ്ണന് ഐഎഎസില് നിന്നു രാജിവെച്ച ശേഷം കരമനയിലെ വൈദേഹിയില് തന്നെയായിരുന്നു സ്ഥിരതാമസം. എഴുത്തും മറ്റു പരിപാടികളുമായി അദ്ദേഹം വൈദേഹിയില് ചെലവഴിച്ചു. പാലക്കാട് കല്പ്പാത്തിയില് ജനിച്ച മലയാറ്റൂര് നാലാം വയസ്സില് കരമന ഗ്രാമത്തിലെ ഒരു അഗ്രഹാരത്തില് വാടകയ്ക്ക് താമസിച്ചിട്ടുമുണ്ട്. അദ്ദേഹത്തിന്റെ പഠനത്തിന്റെ ഒരു ഭാഗവും തിരുവനന്തപുരത്തായിരുന്നു. മലയാറ്റൂരിന്റെ വീട് വാങ്ങിയവര് വൈദേഹി എന്ന പഴയ പേര് മാറ്റിയിട്ടില്ല. ആ വലിയ മനുഷ്യന്റെ മായാത്ത ഓര്മയായി ഈ വീട് ഇന്ന് ശേഷിക്കുന്നു.
ശാസ്ത്രിനഗറില് കുടിവെള്ളത്തിന് ബുദ്ധിമുട്ടുണ്ടായിരുന്ന സമയത്ത് മലയാറ്റൂരിന്റെ ഒരു ലേഖനത്തെ തുടര്ന്ന് അന്ന് ജലസേചനമന്ത്രിയായിരുന്ന ടി.എം.ജേക്കബ് ഇടപെട്ട് പ്രദേശത്ത് പുതിയ പൈപ്പ് ലൈനിട്ടു. ഇപ്പോഴും ആ പൈപ്പ് ലൈനിന് മലയാറ്റൂര് ലൈനെന്നാണ് വിളിപ്പേര്. 1997 ഡിസംബര് 27നാണ് മലയാറ്റൂര് ഈ ലോകത്തോട് വിടപറഞ്ഞത്. വൈദേഹിക്ക് സമീപത്തുള്ള ശ്മശാനത്തിലാണ് അദ്ദേഹം അന്ത്യവിശ്രമം കൊള്ളുന്നതും.
