കൊച്ചി: ദേശീയ പാതയിലെ കുണ്ടന്നൂര്, വൈറ്റില മേല്പ്പാലങ്ങളുടെ നിര്മാണവും ചെന്നൈ ഐഐടിയിലെ വിദഗ്ധരെക്കൊണ്ട് പരിശോധിപ്പിക്കണമെന്ന് ബിജെപി. പാലാരിവട്ടം മേല്പ്പാല നിര്മ്മാണത്തില് ഉണ്ടായ ഗുരുതരമായ പാകപ്പിഴകളും അഴിമതിയും കുണ്ടന്നൂരിലും വൈറ്റിലയിലും ഉണ്ടെന്നതാണ് ബിജെപി നിയോഗിച്ച വിദഗ്ധ സംഘത്തിന്റെ വിലയിരുത്തലെന്ന് ജില്ലാ പ്രസിഡന്റ് എന്.കെ. മോഹന്ദാസ് പറഞ്ഞു.
പാലാരിവട്ടം മേല്പ്പാലത്തില് വിള്ളല് അടക്കമുണ്ടായ സാഹചര്യത്തില് പാലം അടച്ചിടുകയും ചെന്നൈ ഐഐടി- യിലെ വിദഗ്ദ്ധരുടെ പരിശോധനക്ക് വിധേയമാക്കുകയും ചെയ്തു. അതിന്റെ പശ്ചാത്തലത്തില് വിജിലന്സ് അന്വേഷണവും നടന്നു.
തട്ടിപ്പും ക്രമക്കേടും നടന്നു എന്ന് തെളിഞ്ഞതായി വിജിലന്സ് പറയുന്നുണ്ട്. റോഡ്സ് ആന്ഡ് ബ്രിഡ്ജസ് കോര്പറേഷന്, കിറ്റ്കോ, കരാറുകാരന് എന്നിവരെ ഉള്പ്പെടുത്തിയാണ് കേസ്. ഇതിനിടയിലാണ് വൈറ്റില, കുണ്ടന്നൂര് പാലങ്ങളുടെ നിര്മാണത്തെക്കുറിച്ചും ബഹുജനങ്ങളില് നിന്നും സംഘടനകളില് നിന്നുമൊക്കെ സംശയവും ആശങ്കയും ഉയര്ന്നത്.
നിര്മാണ പ്രവര്ത്തനങ്ങള് വിചാരിച്ചതുപോലെ വേഗത്തില് നടന്നില്ലെന്ന് മാത്രമല്ല കരാര് പ്രാകാരമല്ല കാര്യങ്ങള് നടക്കുന്നത് എന്ന തോന്നലും വ്യാപകമായുണ്ടായി. ഇത്തരമൊരു സാഹചര്യത്തിലാണ് എഞ്ചിനീയര്മാര്, അഭിഭാഷകര്, പൊതുപ്രവര്ത്തകര് അടക്കമുള്ളവരെ ഉള്പ്പെടുത്തി രണ്ടു പാലങ്ങളുടെയും നിര്മാണം പരിശോധിച്ച് വിലയിരുത്താന് ബിജെപി നിര്ബന്ധിതമായത്. ഒരു ‘സോഷ്യല് ഓഡിറ്റ്’ ആണ് ബിജെപി ലക്ഷ്യമിട്ടത്. ജനങ്ങള് ഉയര്ത്തിയ ആശങ്കകള് ശരിയാണെന്ന് തെളിഞ്ഞു, മോഹന്ദാസ് പറഞ്ഞു.
റിപ്പോര്ട്ട് തല്ക്കാലം ഞങ്ങള് പുറത്തുവിടുന്നില്ല; എന്നാല് കോടതിയില് എത്തിക്കാന് നടപടിയെടുക്കും. മേല്പ്പാലങ്ങളുടെ നിര്മാണം വിദഗ്ദ്ധരെ വെച്ച് സര്ക്കാര് വിലയിരുത്തണം; അതിന് പാലാരിവട്ടത്ത് ചെയ്തത് പോലെ ചെന്നൈ ഐഐടിയെ തന്നെ സമീപിക്കണം.
സര്ക്കാര് അതിന് തയ്യാറായില്ലെങ്കില് കോടതിയെ സമീപിക്കുമെന്നും മോഹന്ദാസ് പറഞ്ഞു. പരിശോധന വൈകുകയും പാലങ്ങളുടെ നിര്മാണം ഇതുപോലെ തുടരുകയും ചെയ്താല് പാലങ്ങളുടെ ഭാവി അപകടത്തിലാവാന് സാധ്യതയുണ്ട്. അങ്ങനെവന്നാല് അതിന്റെ പൂര്ണ ഉത്തരവാദിത്വം സംസ്ഥാന സര്ക്കാറിനായിരിക്കുമെന്നും ബിജെപി മുന്നറിയിപ്പ് നല്കി.
