തൃശൂര്: മറ്റൊരാളുടെ കവിത മോഷ്ടിച്ച് സ്വന്തം പേരില് പ്രസിദ്ധപ്പെടുത്തിയ കേരളവര്മ കോളേജിലെ അധ്യാപിക ദീപ നിശാന്തിനെ രക്ഷിക്കാന് കൊച്ചിന് ദേവസ്വം ബോര്ഡിന്റെയും പ്രിന്സിപ്പാളിന്റെയും നീക്കം. കവിതാ മോഷണത്തില് റിപ്പോര്ട്ട് സമര്പ്പിക്കാന് പ്രിന്സിപ്പാളിനോട് യുജിസി ആവശ്യപ്പെട്ടിരുന്നെങ്കിലും നല്കിയത് ദീപയെ രക്ഷിക്കാന് പഴുതുകളുള്ള റിപ്പോര്ട്ട്.
അതേസമയം, സിപിഎം സഹയാത്രികയായ ദീപയെ രക്ഷിക്കാന് അനുകൂലമായി പ്രിന്സിപ്പാള് യുജിസിക്ക് സമര്പ്പിച്ച റിപ്പോര്ട്ടും ഇവര്ക്ക് തുണയാകില്ലെന്നാണ് വിവരം. ദീപയില് നിന്ന് യുജിസി നേരിട്ട് വിശദീകരണം തേടുമെന്നാണ് സൂചന. വിശദീകരണം തൃപ്തികരമല്ലെങ്കില് നടപടിയുമുണ്ടാകും. കവിതാ മോഷണ വിവാദം അധ്യാപക സമൂഹത്തിന് ആകെ ചീത്തപ്പേരായെന്നാണ് വിലയിരുത്തല്. കേന്ദ്ര സര്ക്കാരും ഗൗരവത്തോടെയാണ് വിഷയത്തെ കാണുന്നത്.
സ്റ്റാഫ് കൗണ്സില് യോഗം ചേര്ന്ന് എല്ലാവരില് നിന്നും അഭിപ്രായം തേടിയ ശേഷമാണ് പ്രിന്സിപ്പാള് റിപ്പോര്ട്ട് സമര്പ്പിച്ചത്. കവിതാ മോഷണത്തില് കോളേജിന് പരാതിയൊന്നും ലഭിക്കാത്തതിനാല് നടപടിയെടുത്തില്ലെന്നാണ് റിപ്പോര്ട്ടില് എടുത്തുപറഞ്ഞിട്ടുള്ളത്. വിഷയത്തെ ലഘൂകരിക്കാനുള്ള ശ്രമമാണിത്. കേരളമാകെ ചര്ച്ച ചെയ്ത വിഷയമായതിനാല് പ്രിന്സിപ്പാളിന് സ്വയം നടപടിയെടുക്കാമായിരുന്നു. യുജിസി റിപ്പോര്ട്ട് ആവശ്യപ്പെട്ടിട്ടും പ്രിന്സിപ്പാള് അന്വേഷണം നടത്തിയില്ലെന്നതും ശ്രദ്ധേയം.
കൊച്ചിന് ദേവസ്വം ബോര്ഡിനു കീഴിലുള്ള കോളേജായതിനാല് ബോര്ഡിന്റെ അഭിപ്രായവും ബോര്ഡ് സ്വീകരിച്ച നടപടികളെക്കുറിച്ചും റിപ്പോര്ട്ടില് പരാമര്ശിച്ചിട്ടുണ്ട്. ഓള് കേരള പ്രൈവറ്റ് കോളജ് ടീച്ചേഴ്സ് അസോസിയേഷന് (എകെപിസിടിഎ) നല്കിയ പരാതിയുടെ അടിസ്ഥാനത്തില് ദീപയോടു ബോര്ഡ് വിശദീകരണം ചോദിച്ചിരുന്നു. തുടര്ന്ന് കോളേജിന്റെ ഫൈന് ആര്ട്സ് ഉപദേശക സ്ഥാനത്തുനിന്ന് ഇവരെ ഒഴിവാക്കി. ഇക്കാര്യങ്ങളെല്ലാം റിപ്പോര്ട്ടില് വ്യക്തമാക്കിയിട്ടുണ്ട്. എന്നിട്ടും കോളേജിന് പരാതി ലഭിച്ചില്ലെന്ന വിചിത്ര ന്യായമാണ് പ്രിന്സിപ്പാളിന്റേത്.
