കോഴിക്കോട്: മതമൗലികവാദത്തെ തിരിച്ചറിയുന്നതിലും ഭീകരതയെ നേരിടുന്നതിലും ഇടതുപക്ഷം പരാജയപ്പെട്ടുവെന്ന് യുവകലാ സാഹിതി സംസ്ഥാന ജനറല് സെക്രട്ടറി എ.പി. അഹമ്മദ് പറഞ്ഞു. ഐസര് (ഇന്സ്റ്റിറ്റിയൂട്ട് ഓഫ് സോഷ്യല് എഞ്ചിനീയറിംഗ് ആന്ഡ് റിസര്ച്ച്) ‘മതമൗലികവാദം കേരളത്തില് ഉയര്ത്തുന്ന വെല്ലുവിളികള്’ എന്ന വിഷയത്തില് കോഴിക്കോട്ട് സംഘടിപ്പിച്ച സെമിനാറില് സംസാരിക്കുകയായിരുന്നു അദ്ദേഹം. വര്ഗീയതയെ ഭൂരിപക്ഷമെന്നും ന്യൂനപക്ഷമെന്നും കളം തിരിക്കുകയായിരുന്നു അവര്. ഭൂരിപക്ഷ വര്ഗീയതയെ നേരിടാനെന്ന പേരില് ന്യൂനപക്ഷ വര്ഗീയതയെ പിന്തുണക്കുകയും ചെയ്തു. ഇസ്ലാമിക തീവ്രവാദം സാമ്രാജ്യത്വവിരുദ്ധ പോരാട്ടമാണെന്ന വ്യാഖ്യാനവും ശരിയല്ലെന്നും അദ്ദേഹം പറഞ്ഞു.
ന്യൂനപക്ഷ അവകാശങ്ങള് എന്ന പേരില് അടിസ്ഥാനമില്ലാത്ത ആവശ്യങ്ങളാണ് ഓരോ കാലഘട്ടത്തിലും ഉയര്ത്തിക്കൊണ്ടുവന്നത്. ബാബറി മസ്ജിദ് ക്ഷേത്രാവശിഷ്ടങ്ങളില് നിന്നാണ് നിര്മ്മിച്ചതെന്ന യാഥാര്ത്ഥ്യം കണ്ടെത്തിയിട്ടും രാഷ്ട്രീയ താല്പ്പര്യങ്ങള്ക്ക് വേണ്ടി തെറ്റായ വസ്തുത പ്രചരിപ്പിക്കുകയായിരുന്നു. ഇടത് ചരിത്രകാരന്മാരായ ഇര്ഫാന് ഹബീബും റൊമീള ഥാപ്പറും ഇതിന് കൂട്ടുനിന്നു. മാധവിക്കുട്ടിയുടെ മതംമാറ്റത്തിന് പിന്നിലുള്ള ആഗോള ഗൂഢാലോചന പുറത്തുവന്നിട്ടും പുരോഗമനകേരളം പ്രതികരിച്ചില്ല. അവരുടെ അന്ത്യാഭിലാഷം പോലും പൂര്ത്തീകരിക്കാനായില്ല.
മെര്ളി വെസ്ബോര്ഡിന്റെ ആധികാരിക ഗ്രന്ഥം കേരളം തമസ്കരിച്ചു. മതംമാറ്റത്തിന് പിന്നില് സമദാനിയാണെന്ന് വ്യക്തമായിരുന്നു. മതപഠനമാണ് ഭീകരതയുടെ അടിസ്ഥാനം. മതപാഠശാലകളിലെ തെറ്റായ പഠനങ്ങള് അപകടങ്ങള് ഉണ്ടാക്കുന്നു. ഇത്തരം വിദ്യാലയങ്ങള് ഏതായാലും ദേശവിരുദ്ധമായ പഠനങ്ങള് നടക്കുന്നുണ്ടോ എന്ന് സര്ക്കാര് അന്വേഷിക്കണം. മതവിദ്യാഭ്യാസം മതമൗലികവാദത്തിലേക്കും വര്ഗീയതയിലേക്കും ഫാസിസത്തിലേക്കും പിന്നീട് ഭീകരതയിലേക്കും വഴിമാറുന്നതിന് സാദ്ധ്യത ഏറെയാണ്. അന്യനെ അറിയുന്നതോടെ മൗലികവാദം അവസാനിക്കും. അതിനുള്ള സാഹചര്യം ഇന്നില്ല. ഭീതിയുടെ അന്തരീക്ഷമാണ് ഇന്ന് നില നില്ക്കുന്നത്. അദ്ദേഹം പറഞ്ഞു.
ഡോ. എം.ജി.എസ്. നാരായണന് സെമിനാര് ഉദ്ഘാടനം ചെയ്തു. തന്റെ മതം മാത്രം ശരിയാണെന്നു വിശ്വസിക്കുന്നതാണ് മതമൗലികവാദം. തന്റെ മതം ശരിയാണെന്നും മറ്റുള്ളവരുടെ മതം ശരിയാണെന്ന് വിശ്വസിക്കാന് അവര്ക്ക് അവകാശമുണ്ടെന്നും തിരിച്ചറിയണം. അദ്ദേഹം പറഞ്ഞു. എല്.എന്. ദീപക്ദേവ് അദ്ധ്യക്ഷത വഹിച്ചു. ടി.ജി. മോഹന്ദാസ്, അഡ്വ. രമ്യ മുരളി, എന്.പി. ബാലകൃഷ്ണന് എന്നിവര് സംസാരിച്ചു.
