പാലക്കാട്: സിപിഎമ്മുകാര്‍ ചുട്ടുകൊന്ന കഞ്ചിക്കോട് ചടയന്‍കലായ് രാധാകൃഷ്ണന്റെ മകള്‍ അശ്വതിക്ക് എസ്എസ്എല്‍സി പരീക്ഷയില്‍ എല്ലാ വിഷയത്തിലും എ പ്ലസ്. അച്ഛന്റെ ആഗ്രഹം നിറവേറ്റാന്‍ കഴിഞ്ഞെങ്കിലും അതുകാണാന്‍ അദ്ദേഹമില്ലാത്തതിന്റെ സങ്കടത്തിലാണ് അശ്വതി. തന്റെ വിജയം അച്ഛനും കുടുംബാംഗങ്ങള്‍ക്കും സമര്‍പ്പിക്കുന്നതായി ഈ കൊച്ചുമിടുക്കി പറഞ്ഞു.
കഞ്ചിക്കോട്ടെ ധീരബലിദാനി രാധാകൃഷ്ണന്റെ മകള്‍ അശ്വതി കൃഷ്ണന്റെ വിജയം ആര്‍എസ്എസിന് തന്നെ അഭിമാനമെന്ന് പ്രാന്തകാര്യവാഹ് പി.ഗോപാലന്‍കുട്ടി മാസ്റ്റര്‍. ഇന്നലെ രാവിലെ അശ്വതിയുടെ വീട്ടിലെത്തിയ അദ്ദേഹം പൊന്നാടയണിയിച്ചും സമ്മാനം നല്‍കിയും അനുമോദിച്ചു.
കൃഷിക്കാരനായിരുന്ന അച്ഛനെ കണ്ട് വളര്‍ന്ന തനിക്ക് കര്‍ഷകരെ സഹായിക്കുന്ന കൃഷി ഓഫീസര്‍ ആവണമെന്നതാണ് ആഗ്രഹമെന്നും അശ്വതി പറഞ്ഞു. അച്ഛന്റെ ആഗ്രഹം സാധിച്ചുകൊടുത്തതില്‍ പറഞ്ഞറിയിക്കാന്‍ പറ്റാത്ത സന്തോഷമുണ്ടെന്ന് അമ്മ സരിത നിറകണ്ണുകളോടെ പറഞ്ഞു. പാലക്കാട് ഗവ.മോഡല്‍ ഗേള്‍സ് എച്ച്എസ്എസില്‍ നിന്നാണ് അശ്വതി മികച്ചവിജയം നേടിയത്.
ആര്‍എസ്എസ് വിഭാഗ് സംഘചാലക് വി.കെ. സോമസുന്ദരന്‍, ബിജെപി സംസ്ഥാന സെക്രട്ടറി സി. കൃഷ്ണകുമാര്‍, ജില്ലാ അധ്യക്ഷന്‍ അഡ്വ. ഇ. കൃഷ്ണദാസ്, ലഘുഉദ്യോഗ്ഭാരതി സംസ്ഥാന പ്രസിഡന്റ് ബി. രാധാകൃഷ്ണന്‍, ബിഎംഎസ് ജില്ലാ സെക്രട്ടറി വി. രാജേഷ്, യുവമോര്‍ച്ച ജില്ലാ പ്രസിഡന്റ് ഇ.പി. നന്ദകുമാര്‍ തുടങ്ങിയവരും അശ്വതിയെ അനുമോദിക്കാനെത്തി. നേതാക്കളായ എന്‍. ഷണ്‍മുഖന്‍, സി. രവീന്ദ്രന്‍, പ്രസാദ്, എം. കണ്ണന്‍ തുടങ്ങിയവര്‍ അനുമോദനത്തില്‍ പങ്കെടുത്തു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: