കോട്ടയം: വൈക്കം വെള്ളൂര്‍ സഹകരണ ബാങ്കിലെ 38 കോടിയുടെ അഴിമതിക്കേസില്‍ സിപിഎം, സിപിഐ, എന്‍സിപി നേതാക്കള്‍ അടക്കം 34 പേര്‍ക്കെതിരെ വെള്ളൂര്‍ പോലീസ് കേസ് രജിസ്റ്റര്‍ ചെയ്തു. ഒരാള്‍ പിടിയിലായി. ഭരണസമിതി അംഗങ്ങള്‍ക്കും ജീവനക്കാര്‍ക്കുമെതിരെയാണ് കേസ്.
വര്‍ഷങ്ങളായി സിപിഎം ഭരിക്കുന്ന ഈ ബാങ്കില്‍ 38 കോടി രൂപയുടെ അഴിമതിയാണ് സഹകരണ വിഭാഗത്തിലെ ഓഡിറ്റിങ് വിഭാഗം കണ്ടെത്തിയത്. ബിജെപി വൈക്കം നിയോജകമണ്ഡലം പ്രസിഡന്റ് പി.ജി. ബിജുകുമാറിന് ലഭിച്ച വിവരാവകാശ രേഖയിലാണ് ഈ അഴിമതി പുറത്താകുന്നത്. സിപിഎം കോട്ടയം ജില്ലാ കമ്മിറ്റി അംഗവും ബാങ്കിന്റെ മുന്‍ പ്രസിഡന്റുമായ ഇ.എം. കുഞ്ഞുമുഹമ്മദ് ഒന്നാം പ്രതിയും എന്‍സിപി ജില്ലാ പ്രസിഡന്റും ഖാദിബോര്‍ഡ് അഗവുമായി ടി.വി. ബേബി 13-ാം പ്രതിയുമായാണ് കേസെടുത്തത്. മുന്‍ ബാങ്ക് സെക്രട്ടറിയും സിപിഎം നേതാവുമായ എസ്.ജി. ധനഞ്ജയനെ കോടതി റിമാന്‍ഡ് ചെയ്തു.
എഫ്‌ഐആര്‍ നമ്പര്‍ 306-ാം നമ്പര്‍ കേസില്‍ ഐപിസി 1860 നിയമത്തില്‍ 120ബി, 420, 405, 409, 406, 467, 468, 465, 34 എന്നീ വകുപ്പുകള്‍ ചേര്‍ത്താണ് കേസ്. സിപിഎം, എന്‍ജിഒ യൂണിയന്‍, സഹകരണ യൂണിയന്‍ നേതാക്കളായ വി.എം. മനോഹരന്‍, യു. ചന്ദ്രശേഖരന്‍, ജി. പ്രദീപ്, ബ്ലോക്ക് പഞ്ചായത്തംഗവും സിപിഎം നേതാവുമായ കെ.വി. സരോജിനി, സിപിഐ നേതാക്കളായ ടി.വി. രാജന്‍, മിനി ജോയി എന്നിവരടക്കം മുന്‍ ബോര്‍ഡ് അംഗങ്ങളും ജീവനക്കാരും പ്രതികളാണ്. ഒരേ വസ്തു വച്ച് ഒന്നിലധികം വായ്പയെടുക്കുകയും ഈടില്ലാതെ വായ്പ നല്‍കുകയും ഭരണസമിതി അംഗങ്ങളും കുടുംബാംഗങ്ങളും ഒരു ഈടും നല്‍കാതെ വായ്പ എടുക്കുകയും ചെയ്താണ് അഴിമതി നടത്തിയത്. ബാങ്കിലെ അഴിമതിവാര്‍ത്ത ‘ജന്മഭൂമി’യാണ് ആദ്യം പുറത്തുകൊണ്ടുവന്നത്.
ജന്മഭൂമി വാര്‍ത്തയെ തുടര്‍ന്ന് വി.പി. സജീന്ദ്രന്‍ എംഎല്‍എ നിയമസഭയില്‍ ചോദ്യം ഉന്നയിച്ചു. 38 കോടി രൂപയുടെ അഴിമതി നടന്നതായി സഹകരണമന്ത്രി കടകംപള്ളി സുരേന്ദ്രന്‍ രേഖാമൂലം മറുപടിയും നല്‍കി.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: