ശബരിമല: ശബരിമലയിലെ ദേവപ്രശ്ന വിധിപ്രകാരം നടത്തേണ്ട മാറ്റങ്ങളെയും നിര്മാണ പ്രവര്ത്തനങ്ങളെയും സംബന്ധിച്ച് വാസ്തു ശാസ്ത്ര പ്രകാരമുള്ള അളവുകളും സ്ഥാനങ്ങളും നിര്ണയിച്ചു. വാസ്തു ശാസ്ത്ര വിദഗ്ദ്ധന് വേഴപ്പറമ്പ് ചിത്രഭാനു നമ്പൂതിരിപ്പാടിന്റെ നേതൃത്വത്തിലാണ് വാസ്തുപരിശോധന നടത്തിയത്. ഒട്ടേറെ മാറ്റങ്ങള് അടങ്ങിയതാണ് വാസ്തുപരിശോധന റിപ്പോര്ട്ട്.
വാസ്തുശാസ്ത്ര വിധിയനുസരിച്ചുള്ള കണക്കുകളും സ്ഥാനങ്ങളും സംബന്ധിച്ച റിപ്പോര്ട്ട് ഇന്നലെ ദേവസ്വം അധികൃതര്ക്ക് കൈമാറി. ശബരിമലയിലെ ചൈതന്യലോപത്തിന് പരിഹാരമായാണ് ദേവപ്രശ്നവിധി പ്രകാരം വാസ്തുശാസ്ത്രം അനുസരിച്ചുള്ള നിര്മാണ പ്രവര്ത്തനങ്ങള് നടത്താന് സ്ഥാനങ്ങളും അളവുകളും നിശ്ചയിച്ചത്. തന്ത്രിക്കും ശാന്തിമാര്ക്കും മഴ നനയാതെ പടിപൂജ നടത്തുന്നതിന് പതിനെട്ടാംപടിക്ക് വാസ്തു പ്രകാരം മേല്ക്കൂര നിര്മിക്കുന്നതിനുള്ള കണക്കുകളും അളവുകളും തിട്ടപ്പെടുത്തി.
മാളികപ്പുറം ക്ഷേത്രത്തേക്കാള് ഉയരത്തിലാണ് നവഗ്രഹ ക്ഷേത്രത്തിന്റെ ഇപ്പോഴത്തെ സ്ഥാനം. എല്ലാം ഒരേ നിരപ്പില് വേണമെന്ന് ദേവപ്രശ്നത്തില് കണ്ടു. അതുകൊണ്ടാണ് നവഗ്രഹ ക്ഷേത്രം പൊളിക്കാന് തീരുമാനിച്ചത്. നവഗ്രഹക്ഷേത്രത്തിന്റെ തറ മാളികപ്പുറം ക്ഷേത്രത്തിന്റെ അതേ നിരപ്പിലാക്കും. ഇപ്പോഴത്തെ സ്ഥലത്തു നിന്നും അല്പം മുന്നോട്ട് മാറ്റിയാണ് പുതിയ സ്ഥാനം കണ്ടെത്തിയിട്ടുള്ളത്.
ശബരിമല ശ്രീകോവിലിന്റെ കിഴക്ക് വശത്ത് ഗണപതിഹോമം നടക്കുന്ന മണ്ഡപത്തിലെ ഗണപതി വിഗ്രഹം മാളികപ്പുറത്തേക്ക് മാറ്റി പ്രതിഷ്ഠിക്കും. മാളികപ്പുറം ക്ഷേത്രത്തിന്റെ തിടപ്പള്ളി പൊളിച്ചു പണിയും. സന്നിധാനത്തെ ഗോശാല മാറ്റിപണിയും. അയ്യപ്പ ക്ഷേത്രത്തിന്റെ മൂലസ്ഥാനമായ മാളികപ്പുറത്തെ മണിമണ്ഡപം, മാളികപ്പുറം ക്ഷേത്രം എന്നിവയുടെ സ്ഥാനങ്ങള്ക്ക് മാറ്റമില്ല. മണിമണ്ഡപം അതേപടി നിലനിര്ത്തി അതിന്റെ അളവ് അനുസരിച്ചാകും പന്തളം രാജകുടുംബാംഗങ്ങള് ശബരിമലയില് വന്നാല് താമസിക്കുന്ന മണ്ഡപം പുതുക്കി പണിയുക.
വാസ്തുവിധി പ്രകാരമുള്ള കണ്ടെത്തലുകള് സംബന്ധിച്ച വിവരങ്ങള് വേഴപ്പറമ്പ് ചിത്രഭാനു നമ്പൂതിരിപ്പാട് തന്ത്രി കണ്ഠര് രാജീവരെ നേരില് കണ്ട് കൂടിയാലോചിച്ച ശേഷമാണ് റിപ്പോര്ട്ട് ദേവസ്വം അധികൃതര്ക്ക് ഇന്നലെ കൈമാറിയത്.
