കാസര്‍കോട്: പെരിയ ഇരട്ടക്കൊല കേസില്‍ അറസ്റ്റിലായ സിപിഎം ലോക്കല്‍ കമ്മറ്റിയംഗം എ.പീതാംബരന്റെ വീട്ടില്‍ പോയിരുന്നതായി മുന്‍ എംഎല്‍എ കെ.വി.കുഞ്ഞിരാമന്‍ തുറന്ന് പറഞ്ഞതോടെ സിപിഎം കൂടുതല്‍ പ്രതിരോധത്തിലേക്ക്. സ്വകാര്യ ചാനല്‍ ചര്‍ച്ചയിലാണ് അദ്ദേഹം ഇക്കാര്യം സമ്മതിച്ചത്. പൊതുപ്രവര്‍ത്തകന്‍ എന്ന നിലയിലാണ് പീതാംബരന്റെ വീട്ടില്‍ പോയതെന്നും അതില്‍ തെറ്റില്ലെന്നുമാണ് കുഞ്ഞിരാമന്റെ വാദം. പൊതുപ്രവര്‍ത്തകനാണെങ്കില്‍ ആദ്യം പോകേണ്ടിയിരുന്നത് കൊല്ലപ്പെട്ടവരുടെ വീട്ടിലേക്കായിരുന്നുവെന്ന്, കൃപേഷിന്റെയും ശരത്‌ലാലിന്റെയും വീട്ടിലേക്കായിരുന്നു എന്ന വിമര്‍ശനത്തിനു മുന്നില്‍ സിപിഎമ്മിന് ഉത്തരംമുട്ടി. പീതാംബരന്‍ കൊലപാതകം നടത്തിയിട്ടുണ്ടെങ്കില്‍ അത് പാര്‍ട്ടി പറഞ്ഞിട്ടാകുമെന്ന് ഭാര്യ മാധ്യമങ്ങളോട് പ്രതികരിച്ചിരുന്നു. അതിനുശേഷമാണ് കെ.വി.കുഞ്ഞിരാമന്‍ പീതാംബരന്റെ വീട്ടില്‍ പോയത്. പണവുമായി വന്ന് കൂടുതല്‍ പറയുന്നതില്‍ നിന്ന് വിലക്കിയെന്നാണ് കഴിഞ്ഞ ദിവസം പീതാംബരന്റെ കുടുംബം മാധ്യമങ്ങളോട് പറഞ്ഞത്.
ഇരട്ടക്കൊലപാതകം വ്യക്തികള്‍ തമ്മിലുള്ള പ്രാദേശിക പ്രശ്‌നമെന്ന് സിപിഎം ആവര്‍ത്തിക്കുന്നതിനിടെ, പാര്‍ട്ടി ജില്ലാ നേതാക്കള്‍ക്കും എംഎല്‍എയ്‌ക്കുമെതിരെ കൂടുതല്‍ വെളിപ്പെടുത്തലുകള്‍ പുറത്തു വരുന്നു. ഉദുമ എംഎല്‍എ കെ.കുഞ്ഞിരാമന്‍, മുന്‍ എംഎല്‍എയും സിപിഎം ജില്ലാ സെക്രട്ടേറിയറ്റ് അംഗവുമായ കെ.വി.കുഞ്ഞിരാമന്‍, ജില്ലാ സെക്രട്ടേറിയറ്റ് അംഗവും ജില്ലാ പഞ്ചായത്ത് അംഗവുമായ വി.പി.പി. മുസ്തഫ എന്നിവര്‍ക്കെതിരായ വെളിപ്പെടുത്തലുകളാണ് സിപിഎമ്മിനെ വെട്ടിലാക്കിയത്. ഗൂഢാലോചന നടന്നിട്ടുണ്ടെന്നും മുതിര്‍ന്ന നേതാക്കള്‍ക്ക് ഇതേക്കുറിച്ച് അറിയാമെന്നുമാണ് കൊല്ലപ്പെട്ട കൃപേഷിന്റെയും ശരത്‌ലാലിന്റെയും ബന്ധുക്കള്‍ ആവര്‍ത്തിക്കുന്നത്.
പ്രതികള്‍ എത്തിയ വാഹനത്തിന്റെ ഉടമയും കൊലയാളി സംഘാംഗവുമായ സി.ജെ. സജിയെ (സജി ജോര്‍ജ്) പൊലീസ് ആദ്യം കസ്റ്റഡിയിലെടുത്തപ്പോള്‍ കെ.വി.കുഞ്ഞിരാമന്റെ നേതൃത്വത്തിലെത്തിയ സിപിഎം നേതാക്കള്‍ മോചിപ്പിച്ചതായി ആരോപണമുണ്ട്. കൊലപാതകം നടന്നതിന്റെ പിറ്റേന്ന്, രാത്രി 8.30നു ശേഷം വെളുത്തോളി പാക്കം ചെറോട്ടിയിലെ ഊടുവഴിയില്‍ സജിയുടെ വാഹനം കണ്ടു. വാഹനം പൊലീസ് പരിശോധിക്കുന്നതിനിടെ സജി സ്ഥലത്തെത്തി. തുടര്‍ന്നു സജിയെ സ്‌റ്റേഷനിലേക്കു കൊണ്ടുപോകാന്‍ ശ്രമിക്കുന്നതിനിടെ രണ്ടു പ്രാദേശിക നേതാക്കള്‍ക്കൊപ്പം കെ.വി. കുഞ്ഞിരാമന്‍ സ്ഥലത്തെത്തി പൊലീസിനെ ഭീഷണിപ്പെടുത്തി. ബലം പ്രയോഗിച്ചു കാറിന്റെ ഡോര്‍ തുറന്നു സജിയെ പുറത്തിറക്കി ഇവരുടെ വാഹനത്തില്‍ കയറ്റിക്കൊണ്ടുപോയി.
പിറ്റേന്നു മറ്റു പ്രതികള്‍ക്കൊപ്പം സജി അന്വേഷണ ഉദേ്യാഗസ്ഥനു മുന്നില്‍ ഹാജരാവുകയായിരുന്നു. പ്രദേശത്ത് നിരന്തരം സംഘര്‍ഷങ്ങളുണ്ടായപ്പോള്‍ പ്രശ്‌നത്തില്‍ ഇടപെടാന്‍ കെ.കുഞ്ഞിരാമന്‍ എംഎല്‍എയോട് ആവശ്യപ്പെട്ടു. കഴിഞ്ഞ വര്‍ഷം കല്യോട്ട് കോണ്‍ഗ്രസ് നിയന്ത്രണത്തിലുള്ള യുവജന വാദ്യകലാസംഘം ഓഫിസ് തീവച്ചു നശിപ്പിച്ചതിനു പിന്നാലെ തൊട്ടടുത്ത് ഉദ്ഘാടനത്തിനൊരുങ്ങിയ സിപിഎം ഓഫീസ് തകര്‍ത്തിരുന്നു. പിറ്റേദിവസം കെ.കുഞ്ഞിരാമന്‍ സിപിഎം ഓഫീസ് സന്ദര്‍ശിക്കാനെത്തിയപ്പോള്‍ ‘ഇതു ചെയ്തവന്റെ കൈ വെട്ടിയിട്ടുമതി ബാക്കി നടപടികള്‍’ എന്ന് കൂടിനിന്ന അണികളോടു പറഞ്ഞതായി നാട്ടുകാര്‍ പറയുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: