ആലുവ: ശിവഗിരി മഹാസമാധി മണ്ഡപം ഗുരുപ്രതിഷ്ഠ കനക ജൂബിലിയോടനുബന്ധിച്ച് എസ്എന്ഡിപി യോഗം വൈസ് പ്രസിഡന്റ് തുഷാര് വെള്ളാപ്പള്ളി നയിക്കുന്ന ദിവ്യജ്യോതി പ്രയാണത്തിന് ഇന്ന് ആലുവ അദ്വൈതാശ്രമത്തില് വന് വരവേല്പ്പ് നല്കുമെന്ന് എസ്എന്ഡിപി യോഗം ആലുവ യൂണിയന് പ്രസിഡന്റ് വി. സന്തോഷ് ബാബു, സെക്രട്ടറി എ.എന്. രാമചന്ദ്രന് എന്നിവര് പത്രസമ്മേളനത്തില് അറിയിച്ചു.
ആലുവ, പറവൂര്, വൈപ്പിന്, കണയന്നൂര്, കൊച്ചി യൂണിയനുകളുടെ സംയുക്താഭിമുഖ്യത്തില് നടക്കുന്ന സ്വീകരണ സമ്മേളനത്തില് അയ്യായിരത്തിലധികം പേര് പങ്കെടുക്കും. ഇന്നലെ വൈകിട്ട് ചേര്ത്തലയിലെ സ്വീകരണത്തിന് ശേഷം രാത്രിയോടെ ദിവ്യജ്യോതിയും ക്യാപ്റ്റനും ആലുവയിലെത്തി. ഇന്ന് രാവിലെ പത്തിന് അദ്വൈതാശ്രമത്തില് പ്രത്യേകം തയ്യാറാക്കിയ പന്തലിലാണ് സ്വീകരണം. കുറിച്ചി അദ്വൈതാശ്രമം സെക്രട്ടറി സ്വാമി ധര്മ്മ ചൈതന്യയുടെ അദ്ധ്യക്ഷതയില് ചേരുന്ന സമ്മേളനം എസ്എന്ഡിപി യോഗം പ്രസിഡന്റ് ഡോ. എം.എന്. സോമന് ഉദ്ഘാടനം ചെയ്യും. ആലുവ അദ്വൈതാശ്രമം സെക്രട്ടറി സ്വാമി ശിവസ്വരൂപാനന്ദ അനുഗ്രഹപ്രഭാഷണം നടത്തും.
അങ്കമാലി, പറവൂര്, എടയാര് ഭാഗത്ത് നിന്നും പ്രവര്ത്തകരുമായി വരുന്നവര് തോട്ടക്കാട്ടുകര വഴി മണപ്പുറത്തെത്തി വാഹനം പാര്ക്ക് ചെയ്യണം. തുടര്ന്ന് നടപ്പാലം വഴി പ്രവര്ത്തകര് ആശ്രമത്തിലെത്തണം. എറണാകുളം, പഴങ്ങനാട്, വാഴക്കുളം ഭാഗത്ത് നിന്നും പ്രവര്ത്തകരുമായി വരുന്ന വാഹനങ്ങള് ആശ്രമത്തിന് എതിര്വശമുള്ള ഗ്രൗണ്ടില് പാര്ക്ക് ചെയ്യണമെന്നും സ്വാഗതസംഘം ഭാരവാഹികള് അറിയിച്ചു. യോഗം ഡയറക്ടര് ബോര്ഡ് അംഗം കെ.എസ്. സ്വാമിനാഥന്, വനിതാ സംഘം യൂണിയന് ചെയര്മാന് ഷിജി രാജേഷ്, വൈസ് ചെയര്മാന് പൊന്നമ്മ കുമാരന്, കണ്വീനര് ലതാ ഗോപാലകൃഷ്ണന്, യൂത്ത് മൂവ്മെന്റ് ചെയര്മാന് അമ്പാടി ചെങ്ങമനാട് എന്നിവരും പത്രസമ്മേളനത്തില് പങ്കെടുത്തു.
