എം.പി ഫണ്ട് വിനിയോഗം: അവലോകനം നടത്തി

കണ്ണൂര്‍: വടകര എം.പി മുല്ലപ്പള്ളി രാമചന്ദ്രന്റെ പ്രാദേശിക വികസനനിധിയില്‍ നിന്ന് ജില്ലയില്‍ നടപ്പിലാക്കുന്ന പ്രവൃത്തികളുടെ പുരോഗതി ജില്ലാ കളക്ടറുടെ അധ്യക്ഷതയില്‍ കളക്ടറേറ്റില്‍ ചേര്‍ന്ന യോഗം അവലോകനം ചെയ്തു. 2014-15, 2015-16, 2016-17, 2017-18 വര്‍ഷത്തെ പ്രവൃത്തികളില്‍ ഇതുവരെ 86 ശതമാനമാണ് ഫണ്ട് വിനിയോഗം. ആകെ അനുമതി നല്‍കിയ 86 പ്രവൃത്തികളില്‍ 75 എണ്ണം പൂര്‍ത്തിയായി. 2014-15, 2015-16 വര്‍ഷത്തെ എല്ലാ പ്രവൃത്തികളും പൂര്‍ത്തിയായി. 2016-17 വര്‍ഷത്തെ നാലും 2017-18 വര്‍ഷത്തെ ഏഴും ഉള്‍പ്പെടെ 11 പ്രവൃത്തികളാണ് ഇനി പൂര്‍ത്തിയാവാനുള്ളത്.  തലശ്ശേരി റെയില്‍വേ സ്‌റ്റേഷനില്‍ എസ്‌കലേറ്റര്‍ സ്ഥാപിക്കുന്ന പ്രവൃത്തി 2018 മാര്‍ച്ച് 30നകം പൂര്‍ത്തിയാക്കുമെന്ന് റെയില്‍വേ അറിയിച്ചു. 2017 ഡിസംബര്‍ 31ന് പദ്ധതി പൂര്‍ത്തിയാക്കുമെന്നാണ് റെയില്‍വേ നേരത്തെ അറിയിച്ചിരുന്നത്. പദ്ധതിക്ക് 2016 നവംബര്‍ 24ന് ജില്ലാ കളക്ടര്‍ ഭരണാനുമതി നല്‍കിയിരുന്നു. 1.29 കോടി രൂപയാണ് പദ്ധതിക്കായി റെയില്‍വേക്ക് നല്‍കിയത്. പദ്ധതിയുടെ പുരോഗതി അവലോകന റിപ്പോര്‍ട്ട് സമര്‍പ്പിക്കാന്‍ കളക്ടര്‍ നിര്‍ദേശിച്ചു. കുന്നോത്തുപറമ്പ് ഗ്രാമപഞ്ചായത്തിലെ നടപ്പാത നിര്‍മ്മാണത്തിന് 2017 മാര്‍ച്ചില്‍ ഭരണാനുമതി നല്‍കിയിട്ടും ടെന്‍ഡര്‍ പോലും ചെയ്യാന്‍ കഴിയാത്തതിനാല്‍ ജില്ലാ കളക്ടര്‍ ഗ്രാമപഞ്ചായത്തിനോട് വിശദീകരണം തേടി. ഭരണാനുമതിയായ മറ്റു പ്രവൃത്തികളും അവലോകനം ചെയ്തു. യോഗത്തില്‍ ജില്ലാ കളക്ടര്‍ മീര്‍ മുഹമ്മദ് അലി അധ്യക്ഷത വഹിച്ചു. എം.പിയുടെ പ്രതിനിധി കെ. പ്രദീപ്, ജില്ലാ പ്ലാനിങ് ഓഫീസര്‍ കെ പ്രകാശന്‍, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.