പാനൂര്: വളളങ്ങാട്ടെ സിപിഎം അക്രമത്തിനു പിന്നില് സിപിഎം ഏരിയാകമ്മറ്റി അംഗമെന്ന് സൂചന. ഇന്നലെ വളളങ്ങാട് വെച്ച് കുനുമ്മലിലെ ശ്യാംജിത്തിനെ വെട്ടികൊല്ലാന് ശ്രമിച്ചതിനു പിന്നിലും, മൊകേരിയില് നടന്നു വരുന്ന സിപിഎമ്മിന്റെ ഏകപക്ഷീയ അക്രമങ്ങള്ക്കും ചുക്കാന് പിടിക്കുന്നതും മൊകേരിയിലെ ഏരിയാകമ്മറ്റി അംഗമാണ്.
മാക്കൂല്പീടിക, മുത്താറിപീടിക, വളളങ്ങാട് കേന്ദ്രീകരിച്ച് നിരന്തരമായി പ്രകോപനം സൃഷ്ടിച്ച് കൊണ്ട് സിപിഎം പ്രവര്ത്തകര് അഴിഞ്ഞാടാന് തുടങ്ങിയിട്ട് കുറച്ചു നാളുകളായി. കെ.ടി.ജയകൃഷ്ണന് മാസ്റ്റര് വധത്തില് ശിക്ഷിക്കപ്പെട്ട്, നിലവില് നേതാവിന്റെ മുഖംമൂടി അണിഞ്ഞ് വിലസുന്ന ഈ നേതാവിനെതിരെ കതിരൂര് മനോജ് വധത്തിലും അന്വേഷണം ഒരു ഘട്ടത്തില് പോയതാണ്. മൊകേരി വാച്ചാലിപീടിക, പാത്തിപാലം, ആറ്റുപുറം ഭാഗങ്ങളിലെ ക്രിമിനല് സംഘങ്ങളെ ഉപയോഗിച്ചാണ് അക്രമം. വളളങ്ങാട് ഡിവൈഎഫ്ഐ നേതാവ് ബൈജുവിനെയും, മൊകേരിയിലെ വിജേഷിനെയും അക്രമിച്ചൂവെന്ന നുണപ്രചരണം നടത്തിയാണ് ശ്യാംജിത്തിനെ അക്രമിച്ചത്.
ബൈജുവും, വിജേഷുമായി ഗുരുസന്നിധി ഉത്സവത്തിന്റെ ഭാഗമായുളള കലാപരിപാടിക്കിടെ ഒരു വിഭാഗം യുവാക്കളുമായി നേരിയ സംഘര്ഷമുണ്ടായിരുന്നതിനെ രാഷ്ട്രീയവല്ക്കരിച്ചാണ് ഇന്നലെ ശ്യാംജിത്തിനെ വധിക്കാന് ശ്രമിച്ചത്. ഉത്സവപറമ്പിലെ പ്രശ്നത്തില് ഭാഗമല്ലാത്ത ശ്യാംജിത്തിനെ വകവരുത്തി മേഖലയില് കലാപം അഴിച്ചുവിടാനുളള നീക്കമായിരുന്നു ഇതെന്ന് വ്യക്തമാണ്. ഇതിനെല്ലാം ചരടു വലിച്ചത് കെ.ടി.ജയകൃഷ്ണന് മാസ്റ്റര് വധത്തിലും പ്രവര്ത്തിച്ച അതേ ബുദ്ധി തന്നെ. പോലീസ് അന്വേഷണം നടത്തില്ലെന്നും, നമ്മുടെ പാര്ട്ടി ഭരണമാണെന്നുമുളള നിലപാടാണ് ക്രിമിനല് സംഘങ്ങള്ക്ക് ഈ നേതാവ് പറഞ്ഞു നല്കുന്നതത്രേ. അക്രമത്തിനായി കാരണം തേടുന്ന സിപിഎം നേതൃത്വം നിസാര പ്രശ്നങ്ങളെ പോലും സംഘര്ഷത്തിനായി ഉപയോഗിക്കുന്നതാണ് ഇവിടെ കാണുന്നത്.
