കൊച്ചി: ആഡംബര കാര് വ്യാജ വിലാസത്തില് രജിസ്റ്റര് ചെയ്തെന്ന കേസില് നടന് ഫഹദ് ഫാസിലിനും നടി അമലാ പോളിനും മോട്ടോര് വാഹന വകുപ്പ് നോട്ടീസ് നല്കി. ഫഹദിന്റെ 70 ലക്ഷം വില വരുന്ന മെഴ്സിഡസ് ഇ ക്ലാസ് ബെന്സ് രജിസ്റ്റര് ചെയ്തിരിക്കുന്നത് പോണ്ടിച്ചേരിയിലെ വ്യാജമേല്വിലാസത്തിലാണെന്നാണ് കണ്ടെത്തിയിരിക്കുന്നത്. 14 ലക്ഷം രൂപയുടെ നഷ്ടമാണ് സംസ്ഥാനത്തിനുണ്ടായിരിക്കുന്നത്.
ഫഹദ് ഫാസിലും കുടുംബവും തൃപ്പൂണിത്തുറയിലെ ചോയ്സ് ടവറിലാണ് താമസിക്കുന്നത്. രജിസ്ട്രേഷന് പോണ്ടിച്ചേരിയിലാണെങ്കിലും കൊച്ചിയിലാണ് വണ്ടി ഓടുന്നത്. പോണ്ടിച്ചേരിയില് വാഹനം രജിസ്റ്റര് ചെയ്യണമെങ്കില് സ്ഥിരം താമസക്കാരനായിരിക്കണമെന്നാണ് വ്യവസ്ഥ.
കേരളത്തില് നിന്നുള്ള ആഡംബര വാഹനങ്ങള് പോണ്ടിച്ചേരിയിലെ വ്യാജ വിലാസത്തില് രജിസ്റ്റര് ചെയ്യുന്ന വാര്ത്ത പുറത്തുവന്നതോടെ പോണ്ടിച്ചേരി ലഫ്. ഗവര്ണര് കിരണ് ബേദി നടപടികളെടുത്തു തുടങ്ങി. വ്യക്തമായ രേഖകളില്ലാതെ അന്യസംസ്ഥാനങ്ങളില് നിന്നുള്ള വാഹനങ്ങള് രജിസ്റ്റര് ചെയ്തു നല്കരുതെന്ന് കിരണ് ബേദി ഉദ്യോഗസ്ഥര്ക്ക് കര്ശന നിര്ദേശം നല്കി.
അമല പോളിന്റെ മെര്സിഡസ്- ബെന്സ് എസ് ക്ലാസ് രജിസ്റ്റര് ചെയ്തിരിക്കുന്നത് എഞ്ചിനീയറിങ് വിദ്യാര്ത്ഥിയുടെ വിലാസത്തിലാണ്. ആഗസ്തില് ചെന്നൈയിലെ ഡീലറില് നിന്നാണ് 1.12 കോടി വില വരുന്ന ബെന്സ് എസ് ക്ലാസ് കാര് അമല വാങ്ങിയത്. തുടര്ന്ന് പോണ്ടിച്ചേരിയിലാണ് രജിസ്ട്രേഷന് നടത്തിയത്. കാര് കേരളത്തില് രജിസ്റ്റര് ചെയ്യണമെങ്കില് 20 ലക്ഷത്തോളം രൂപ നികുതി ഇനത്തില് അമല അടയ്ക്കണം.
കേരളത്തില് നിലവിലുള്ള നിയമമനുസരിച്ച് അന്യസംസ്ഥാനത്തുള്ള കാര് ഇവിടെ ഓടിക്കുകയാണെങ്കില് ഒരു വര്ഷത്തിനുള്ളില് രജിസട്രേഷന് ഉടമയുടെ പേരിലേക്ക് മാറ്റുകയും, വാഹന വിലയുടെ 20 ശതമാനം റോഡ് നികുതിയായി അടയ്ക്കുകയും വേണം.
