കള്ളക്കടത്ത് കേസിലെ പിടികിട്ടാപ്പുള്ളി പ്രതി അബു ലെയ്സിനൊപ്പം (വൃത്തത്തില്) കൊടുവള്ളി എംഎല്എ കാരാട്ട് റസാഖും കുന്ദമംഗലം എംഎല്എ പി.ടി.എ. റഹീമും. ദുബായിലെ ചടങ്ങിനിടെ എടുത്ത ചിത്രം
കോഴിക്കോട്: സ്വര്ണ്ണ കള്ളക്കടത്ത് കേസിലെ പ്രതികളുമായുള്ള ബന്ധം പുറത്തായതിന് പിന്നാലെ പിടികിട്ടാപ്പുള്ളികളുമായി സിപിഎം പിന്തുണയുള്ള എംഎല്എമാരുടെ ബന്ധം വെളിവാക്കുന്ന ചിത്രങ്ങള് പുറത്ത്.
കള്ളക്കടത്ത് കേസിലെ പിടികിട്ടാപ്പുള്ളി പ്രതി അബു ലെയ്സിനൊപ്പം കൊടുവള്ളി എംഎല്എ കാരാട്ട് റസാഖും കുന്ദമംഗലം എംഎല്എ പി.ടി.എ. റഹീമും നില്ക്കുന്ന ചിത്രങ്ങളാണ് പുറത്തുവന്നിരിക്കുന്നത്. 2013ലാണ് കള്ളക്കടത്ത് കേസില് പ്രതിയായ അബു ലെയ്സിനെതിരെ ലുക്കൗട്ട് നോട്ടീസ് പുറപ്പെടുവിച്ചത്. ഷഹബാസ്, നബീല് അബ്ദുല് ഖാദര് എന്നിവര്ക്കെതിരെയും ലുക്കൗട്ട് നോട്ടിസ് പുറപ്പെടുവിച്ചിരുന്നു.
മേപ്പൊയില് എന്ന ബിസിനസ് ഗ്രൂപ്പിന്റെ ദുബായിലെ സ്ഥാപനത്തിന്റെ ഉദ്ഘാടന ചടങ്ങിലാണ് കള്ളക്കടത്ത് കേസിലെ പ്രതികള്ക്കൊപ്പം എംഎല്എമാര് ദുബായില് പങ്കെടുത്തത്. സ്വര്ണ്ണക്കള്ളക്കടത്ത് കേസിലെ മൂന്നാം പ്രതിയാണ് അബ്ദുള് ലെയ്സ്.
2016 ജൂണിലാണ് കൊടുവള്ളി സ്വദേശി മേപ്പൊയില് മുഹമ്മദിന്റെ കട ഉദ്ഘാടനം ചെയ്യാന് എംഎല്എമാര് ദുബായില് എത്തിയത്. മുഹമ്മദിന്റെ അടുത്ത സുഹൃത്തായ അബൂലെയ്സും ചടങ്ങിനെത്തിയിരുന്നു. അന്നെടുത്ത ചിത്രങ്ങളാണ് ഇപ്പോള് പുറത്തായത്.
ലുക്കൗട്ട് നോട്ടിസ് വിവരം മുന്കൂട്ടി അറിഞ്ഞ ഇവര് വിദേശത്തേയ്ക്കു കടക്കുകയായിരുന്നു. അബൂലെയ്സ് കള്ളക്കടത്തുകേസില് പ്രതിയാണെന്ന് അറിയാമെന്നും വേദി പങ്കിട്ടത് അറിവോടെയാണെന്നും പി.ടി.എ റഹീം എംഎല്എ പ്രതികരിച്ചു.
കൊടുവള്ളിയില് ജനജാഗ്രതാ യാത്രയില് കാരാട്ട് ഫൈസലിന്റെ ആഡംബര കാറില് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് പെങ്കടുത്തത് വിവാദമായതിന് പിന്നാലെയാണ് കള്ളക്കടത്ത് കേസിലെ മറ്റ് പ്രതികളുമായി എംഎല്എമാര്ക്കുള്ള ബന്ധം പുറത്താവുന്നത്.
