പാലക്കാട്: മുണ്ടൂരില് ഭാരതീയ വിദ്യാനികേതന് സ്ക്കൂള് ബസിന് നേരെ സിപിഎം അക്രമം. ബസിന്റെ ചില്ലുകള് അക്രമികള് അടിച്ചു തകര്ത്തു.
വിദ്യാലയങ്ങള്ക്ക് നേരെ പോലും അക്രമം നടത്തുന്നത് ഖേദകരമാണെന്ന് സ്ഥലം സന്ദര്ശിച്ച എബിവിപി ദേശീയ സഹസംഘടന സെക്രട്ടറി ജി.ലക്ഷ്മണ് പറഞ്ഞു. ഇടതുസര്ക്കാരിന്റെ പിന്തുണയോടെയാണ് കേരളത്തില് അക്രമങ്ങള് നടക്കുന്നതെന്നും അദ്ദേഹം ആരോപിച്ചു.
ഇന്നലെ പുലര്ച്ചെയാണ് ഭാരതീയ വിദ്യാനികേതന് കീഴിലുള്ള പാലക്കാട് ഹരിശ്രീ നാരായണീയ വിദ്യാനികേതന് സ്ക്കൂളിന്റെ ബസിന് നേരെ അക്രമം ഉണ്ടായത്. മുണ്ടൂരില് നിര്ത്തിയിട്ടിരുന്ന ബസിന്റെ മുന്നിലെയും പിറകിലെയും ചില്ലുകള് തകര്ത്ത നിലയിലാണ്.
കഴിഞ്ഞ കുറച്ച് ദിവസങ്ങളായി പ്രദേശത്ത് ബിജെപി ആര്എസ്എസ് പ്രവര്ത്തകര്ക്ക് നേരെ സിപിഎം നടത്തുന്ന അക്രമങ്ങളുടെ തുടര്ച്ചയാണ് ബസ് തകര്ക്കാനുള്ള ശ്രമമെന്ന് ഭാരതീയ വിദ്യാനികേതന് നേതൃത്വം ആരോപിച്ചു.
ഞായറാഴ്ച രാത്രി മുണ്ടൂരില് ബിജെപി പ്രവര്ത്തകനായ കൃഷ്ണകുമാറിനെയും, ജോസഫ്,മനു എന്നിവരെയും സിപിഎം ഗുണ്ടകള് അക്രമിച്ചിരുന്നു.
ബിജെപി സംസ്ഥാന അധ്യക്ഷന് കുമ്മനം രാജശേഖരന് നയിച്ച ജനരക്ഷായാത്രക്ക് മുണ്ടൂരില് നിന്നുള്ള ജനപങ്കാളിത്തമാണ് സിപിഎമ്മിനെ ചൊടിപ്പിച്ചത്.
ബിജെപി സംസ്ഥാന വൈസ് പ്രസിഡന്റ് എന്.ശിവരാജന്, ജില്ലാ പ്രസിഡന്റ് അഡ്വ.ഇ കൃഷ്ണദാസ്, കെ.സുധീര്, എ.സി.രാജേന്ദ്രന്, എബിവിപി ദേശീയ സെക്രട്ടറി ഒ .നിധീഷ്,സുരേഷ്വര്മ്മ, കെ.സി.സുരേഷ്, കെ.സി.സുന്ദരന്, ഷണ്മുഖസുന്ദരന്, സുധാകരന്, സുലൈമാന് എന്നിവര് സ്ഥലം സന്ദര്ശിച്ചു.
