ആലപ്പുഴ: കാലിലെ കമ്പിനീക്കാന് സ്വകാര്യ ആശുപത്രിയില് നടത്തിയ ശസ്ത്രക്രിയയ്ക്കുശേഷം മുറിവില് കോട്ടന്തുണി വച്ചു തുന്നി, ഗൃഹനാഥന് നരകയാതന അനുഭവിച്ചത് മൂന്നുമാസം. ആലപ്പുഴ വണ്ടാനം വൈശാഖത്തില് എസ്. വസന്തകുമാറി(43)നാണ് ദുരനുഭവം ഉണ്ടായത്.
എറണാകുളത്തെ സ്വകാര്യ ആശുപത്രിയിലായിരുന്നു ഗുരുതരമായ ഈ ആനാസ്ഥ. ഗുജറാത്തിലെ സീഫുഡ് കമ്പനിയില് ജീവനക്കാരനായിരുന്നു വസന്തകുമാര്. മൂന്നു വര്ഷം മുമ്പ് കണ്ടെയ്നറില് നിന്നു വീണ് പരിക്കേറ്റതിനെത്തുര്ന്ന് അഹമ്മദാബാദിലെ ആശുപത്രിയില് ശസ്ത്രക്രിയ നടത്തുകയും കാലില് കമ്പിയിടുകയും ചെയ്തു.
കഴിഞ്ഞ ജൂലൈ മൂന്നിനാണ് എറണാകുളത്തെ പ്രശസ്തമായ സ്വകാര്യ ആശുപത്രിയില് ശസ്ത്രക്രിയ നടത്തിയത്. മുറിവ് ഉണങ്ങാത്തതിനെത്തുടര്ന്ന് ആശുപത്രി അധികൃതരെ ബന്ധപ്പെട്ടെങ്കിലും വൈകാതെ ഉണങ്ങുമെന്നായിരുന്നു മറുപടി. ഇതിനിടെ ഇയാള് ഗുജറാത്തിലേക്ക് മടങ്ങുകയും പിന്നീട് മുറിവില് നിന്നും വെള്ളം വന്നുതുടങ്ങിയതോടെ അടുത്തുള്ള ഡോക്ടറെ സമീപിച്ചു.
തുടര്ന്ന് നടത്തിയ പരിശോധനയിലാണ് മുറിവിനുള്ളില് നിന്നും ശസ്ത്രക്രിയയ്ക്ക് ഉപയോഗിച്ച കോട്ടന് ലഭിച്ചത്. ഇതേക്കുറിച്ച് സ്വകാര്യ ആശുപത്രിയെ ധരിപ്പിച്ചെങ്കിലും അവര് നിരുത്തരവാദപരമായി പെറുമാറുകയായിരുന്നുവെന്ന് വസന്തകുമാര് പറഞ്ഞു.
രണ്ടുകുട്ടികളും ഭാര്യയുമടങ്ങുന്ന കുടുംബമാണ് വസന്തകുമാറിന്. ഇതുസംബന്ധിച്ച് നിയമനടപടി സ്വീകരിക്കാനൊരുങ്ങുകയാണ് ഇയാള്.
