കണ്ണൂര്: ഒന്നര വര്ഷത്തെ ഒരുക്കങ്ങള്ക്കും ബോധവല്ക്കരണ-പരിശീലന പരിപാടികള്ക്കും ശേഷം സമൃദ്ധി സംരംഭകത്വ പദ്ധതിയുടെ കീഴില് വിവിധ വരുമാനദായക പരിപാടികള് പ്രയോഗവല്ക്കരിക്കുന്ന ഘട്ടം ആരംഭിച്ചു കഴിഞ്ഞതായി ജെയിംസ് മാത്യു എംഎല്എ പറഞ്ഞു.
സമൃദ്ധിയുടെ ഭാഗമായി ജൂലൈ 13ന് പരിയാരത്ത് ആരംഭിച്ച യന്ത്രവല്കൃത ചകിരി സംസ്കരണ യൂനിറ്റ് പ്രതിദിനം 4,000 തൊണ്ട് ചകിരിയാക്കി മാറ്റുന്നതായി എംഎല്എ പറഞ്ഞു. പഞ്ചായത്തിലെ അഞ്ചോ ആറോ സ്ത്രീകളെ യോജിപ്പിച്ച് ഒരു യൂനിറ്റ് ആരംഭിച്ചാല് ഒരു രൂപ പോലും സ്വന്തമായി മുടക്കാതെ 15,000 രൂപയോളം ഒരു അംഗത്തിന് പ്രതിമാസം വരുമാനം നേടാന് കഴിയും. യന്ത്രം വാങ്ങാന് 90 ശതമാനം ഗ്രാന്റ് കയര് ബോര്ഡ് നല്കും. തൊണ്ട് ഒന്നിന് ഒരു രൂപ വെച്ചും നല്കും. 40,000 രൂപയുടെ, വീട്ടില് പ്രവര്ത്തിപ്പിക്കാവുന്ന ചെറിയ തരം നെല്ലുകുത്തു യന്ത്രം സ്ഥാപിച്ച് ജൈവ അരി വിപണിയിലെത്തിച്ചാല് ഉയര്ന്ന വില ലഭിക്കും. ഇതിലൂടെ നെല്കൃഷി ലാഭകരമാവുമെന്നും എംഎല്എ ചൂണ്ടിക്കാട്ടി. നെല്ലുകുത്ത് യന്ത്രം യോഗത്തിന് ശേഷം കലക്ടറേറ്റ് ഓഡിറ്റോറിയത്തില് വെച്ച് പ്രവര്ത്തിപ്പിക്കുകയും ചെയ്തു. ഓരോ നാനോ ക്ലസ്റ്ററും അവര്ക്ക് സ്വന്തം നിലയില് ചെയ്യാന് കഴിയാത്ത പദ്ധതികളുണ്ടെങ്കില് എത്ര കോടി രൂപയായാലും അതിന് വേണ്ട പണം കണ്ടെത്തി നല്കുമെന്ന് എംഎല്എ പറഞ്ഞു.
