പാലക്കാട്:ദീപാവലിയോടനുബന്ധിച്ച് 125 ഡി.ബി.യില് കൂടുതല് ശബ്ദമുള്ള പടക്കങ്ങളുടെ (കൂട്ടിക്കെട്ടിയ പടക്കങ്ങള്,മാലപ്പടക്കങ്ങള്, ഏറുപടക്കങ്ങള് തുടങ്ങിയവ) വില്പനയും ഉപയോഗവും മലിനീകരണ നിയന്ത്രണ ബോര്ഡ് നിരോധിച്ചു.
ശബ്ദമുണ്ടാക്കുന്ന പടക്കങ്ങള്ക്ക് പകരം വര്ണപൊലിമയുള്ളതും പ്രകാശം പരത്തുന്നതുമായ പടക്കങ്ങള് ഉപയോഗിക്കാന് എല്ലാവരും ശ്രദ്ധിക്കണമെന്ന് മലിനീകരണ നിയന്ത്രണ ബോര്ഡ് എക്സിക്യൂട്ടീവ് എഞ്ചിനീയര് ആര്തര് സേവ്യര് അറിയിച്ചു. രാത്രി പത്തിനും രാവിലെ ആറിനുമിടയില് ശബ്ദമുണ്ടാക്കുന്ന പടക്കങ്ങള് ഉപയോഗിക്കരുത്. നിശബ്ദമേഖലകളായി സംരക്ഷിക്കേണ്ട സ്ഥലങ്ങളായ ആശുപത്രികള്,കോടതികള്,വിദ്യാഭ്യാസ സ്ഥാപനങ്ങള്,ആരാധനാലയങ്ങള് എന്നിവയുടെ 100 മീറ്റര് പരിസരത്ത് പടക്കങ്ങള് പൊട്ടിക്കുന്നതിന് നിരോധനമുണ്ട്.
ഇടുങ്ങിയ സ്ഥലങ്ങളില് ശബ്ദമുണ്ടാക്കുന്ന പടക്കങ്ങള് പൊട്ടിക്കുന്നത് ഒഴിവാക്കണം.പടക്കങ്ങള് ഒരുമിച്ച് പൊട്ടിക്കുമ്പോഴുണ്ടാവുന്ന ശബ്ദത്തിന്റെ തീവ്രത ആരോഗ്യപ്രശ്നങ്ങള്ക്ക് ഇടയാകുമെന്നതിനാല് പടക്കങ്ങളുടെ നിര്മാണത്തിനും ഉപയോഗത്തിനും നിയന്ത്രണമേര്പ്പെടുത്തി കേന്ദ്ര പരിസ്ഥിതി മന്ത്രാലയം വിജ്ഞാപനം പുറപ്പെടുവിച്ചിട്ടുണ്ട്.
കൂടാതെ സുപ്രീം കോടതിയും ഇതുസംബന്ധിച്ച് മാര്ഗനിര്ദ്ദേശം പുറപ്പെടുവിച്ചിട്ടുണ്ട്.അതിനാല് ദീപാവലിക്കാലത്ത് പടക്കങ്ങള് പൊട്ടിക്കുമ്പോള് ദുരന്തങ്ങള് ഒഴിവാക്കാനായി മലിനീകരണ നിയന്ത്രണ ബോര്ഡിന്റെ നിയന്ത്രണങ്ങളുമായി പടക്കം വില്പനക്കാരും പൊതുജനങ്ങളും സഹകരിക്കണം.
