കണ്ണാടി: മഴ പെയ്ത് മാനം തെളിഞ്ഞു എന്നാല് കുട്ടനാട് കണ്ണാടി ഗവ.യുപി സ്ക്കൂളിലെ രണ്ടാം ക്ലാസ്സുകാരന് അമല് മനോജിനും കുടുംബത്തിനും ആ തെളിച്ചം എത്തി തുടങ്ങാന് ഇനിയും ആയിട്ടില്ല. രണ്ടാഴ്ച മുമ്പുണ്ടായ ശക്തമായ മഴയില് തകര്ന്നത് ഒരു വീട് മുഴുവനാണ്.
സഹപാഠിയുടെ ദുരിതം സ്ക്കുളില് ചര്ച്ചയായപ്പോള് പോയി കാണണം എന്നത് കുട്ടികള്ക്ക് നിര്ബന്ധമായി, വെറുതെ പോകാന് കഴിയില്ലല്ലോ എന്തെങ്കിലും കൊടുക്കണം കാരുണ്യ നിധിയിലേക്ക് എല്ലാ കുട്ടികളും ചെറിയ തുകകള് സമാഹരിച്ചു. അദ്ധ്യാപകരും വിഹിതം നല്കി.
അമല് മനോജിന്റെ വീട്ടില് കണ്ട കാഴ്ചകള് ഈറനണിയിക്കുന്നതായിരുന്നു. മേല്ക്കൂരകള് എല്ലാം തകര്ന്ന് അടുക്കളയില് താമസം. കരുതിയ സഹായം കൈമാറി.
പ്രഥമാദ്ധ്യാപകന് ടി.എസ്.പ്രദീപ് കുമാര്, പിടിഎ പ്രസിഡന്റ് ഒ.സി. സന്തോഷ് മറ്റ് അംഗങ്ങള്, അദ്ധ്യാപകരായ കെ.സി. സുമ, മിനിമോള്ഫ്രാന്സിസ്, പി.പി.ബിജു, എ. സുനില്, പി.എസ്.ആശ, കെ.എസ്.ശരത്ത് തുടങ്ങിയവര് നേതൃത്വം നല്കി.
