ചാലക്കുടി: മേലൂര് പഞ്ചായത്തിലെ ബി.എല്.ഒ ഓഫീസര്ക്ക് കൈക്കൂലി നല്കാത്തതിനാല് തിരിച്ചറിയല് രേഖ നല്കുന്നില്ലെന്ന് പരാതി.
മേലൂര് പഞ്ചായത്തിലെ മൂന്നാം വാര്ഡില് താമസിക്കുന്ന തമിഴ് നാട് സ്വദേശിയായ സൈമണ് കഴിഞ്ഞ പഞ്ചായത്ത് തെരഞ്ഞെടുപ്പ് സമയത്ത് തമിഴ്നാട്ടിലെ തിരിച്ചറിയല് കാര്ഡ് പുതുക്കാനായി അപേക്ഷിച്ചിരുന്നു.
ഇതനുസരിച്ച് പുതിയ കാര്ഡ് വന്നെങ്കിലും മൂന്നാം വാര്ഡിലെ ഗ്രാമസേവകനും ജൂനിയര് ഹെല്ത്ത് ഇന്സ്പെകടറുമായ അജയന് കാര്ഡ് നല്കാതെ കീറി കളയുകയായിരുന്നുവെന്ന് സൈമണ് ചാലക്കുടി ഡിവൈഎസ്പിക്ക് നല്കിയ പരാതിയില് പറയുന്നു.
ഇതിനെ തുടര്ന്ന് തെരഞ്ഞെടുപ്പില് വോട്ട് ചെയ്യുവാന് സാധിച്ചില്ല. വര്ഷങ്ങളായി പൂലാനിയില് തയ്യല് കട നടത്തി വരികയാണ് സൈമണ്. വീണ്ടും പുതിയ കാര്ഡിനായി പഞ്ചായത്ത് മെമ്പര് ശ്രീദേവി ജയന് വഴി അപേക്ഷിക്കുകയും മേലൂര് പഞ്ചായത്ത് പ്രസിഡന്റ് പി.പി.ബാബു ഇയാള് പഞ്ചായത്തിലെ സ്ഥിര താമസക്കാരനാണെന്ന് കാണിച്ച കത്ത് നല്കിയിട്ടും പുതിയ കാര്ഡ് നല്കുവാന് അജയകുമാര് തയ്യാറാകുന്നില്ലെന്ന് പറയുന്നു.
കാര്ഡ് നല്കുവാന് പ്രതിഫലം നല്കണമെന്നാണ് ഉദ്യോഗസ്ഥന് ആവശ്യപ്പെടുന്നത്. കാര്ഡ് ചോദിച്ചപ്പോള് ഭീഷണിപ്പെടുത്തുന്നതായും സൈമണ് ഡിവൈഎഎസ്പി നല്കിയ പരാതിയില് പറയുന്നു.
ഇതിനെതിരെ തെരഞ്ഞെടുപ്പ് കമ്മീഷന്, ജില്ലാ കളക്ടര് തുടങ്ങിയവര് പരാതികള് നല്കുമെന്ന് സൈമണ് പറഞ്ഞു.
