ഹിറ്റ്ലര്ക്കുവേണ്ടി പള്ളി മണിയോ. സംശയംവേണ്ട. ഹിറ്റ്ലറുടെ നാടായ ജര്മനിയില് തന്നെയാണ് സ്വസ്തികാചിഹ്നം കൊത്തിയ പള്ളിമണി ഈയിടെ കണ്ടെത്തിയത്. എല്ലാം മാതൃഭൂമിക്കുവേണ്ടിയെന്നും അതില് ആലേഖനം ചെയ്തിരുന്നു. ദൈവത്തിനു പകരം ഭൂമിയിലെ പിശാചായ ഹിറ്റ്ലറുടെ പേരില് ഇങ്ങനെയൊരു പള്ളിമണി മുഴങ്ങിയത് ലോകത്തെ തന്നെ നടുക്കുന്നു.
ലോകംകണ്ട മുന്തിയ നരാധമനെന്നും ഏകാധിപതിയെന്നും അഡോള്ഫ് ഹിറ്റ്ലറെ വിശേഷിപ്പിക്കുമ്പോഴും ലോകത്ത് ഒളിഞ്ഞും തെളിഞ്ഞും അയാള്ക്ക് ആരാധകരുണ്ടെന്നതും സത്യമാണ്. അതു കൂടുതലും ഹിറ്റ്ലറുടെ നാടായ ജര്മനിയില് തന്നെയാണ്. നവനായി എന്ന പ്രസ്ഥാനം തന്നെയുണ്ട്. ഹിറ്റ്ലറെ ആരാധിക്കുകയും അത്തരം ഭരണത്തിനുവേണ്ടി മാനസികമായി കോപ്പുകൂട്ടുന്നവരുമാണ് ഇത്തരക്കാര്. വര്ഷങ്ങള്ക്കു മുന്പ് നവനാസികളുടെ വമ്പിച്ച ഒരുപ്രകടനം ജര്മനിയില് നടന്നിരുന്നു. അടുത്തിടേയും നടക്കുകയുണ്ടായി.
വംശവെറിയുടെ സര്വനാശം വിതച്ചുകൊണ്ട് ലോകത്തെ ഞെട്ടിക്കുകയായിരുന്നു ഹിറ്റ്ലര്. 63 ലക്ഷം ജൂതരെയാണ് വംശവെറിയുടെ പേരില് ഹിറ്റ്ലര് കാലപുരിക്കയച്ചത്. പിന്നീട് ഈവെറി വെറുപ്പിന്റെ തത്വശാസ്ത്രമാക്കി ലോകത്തെ തന്നെ ഭസ്മമാക്കാന് ഹിറ്റ്ലര് കുതിച്ചത് ചരിത്രം. കമ്യൂണിസ്റ്റുകാരേയും ഇങ്ങനെ വേട്ടയാടുകയായിരുന്നു.
ഹിറ്റ്ലറുടെ ആത്മകഥയായ മെയ്ന് കാംഫ് ശത്രുതയുടെ ബൈബിള് എന്നപേരിലും കുപ്രസിദ്ധമാണ്. അമേരിക്കയിലും യൂറോപ്പിലും വംശവെറിയുടെ പുതിയവിത്തുകള് ഇപ്പോള് മുളക്കുന്നുവെന്ന് പ്രശ്നം നിലവിലുള്ളപ്പോഴാണ് ഇത്തരമൊരു പള്ളിമണി വല്ലാത്ത കഥാപാത്രമാകുന്നത്.
