വൈപ്പിന്‍ : തെക്കന്‍മാലിപ്പുറത്ത് കക്കൂസ് മാലിന്യം കൊണ്ടു പോകുന്ന വാഹനത്തിലെത്തിയവരെ ചോദ്യം ചെയ്ത യുവാവിനെ തട്ടിക്കൊണ്ട് പോയി മര്‍ദ്ദിച്ച നാലംഗസംഘത്തെ ഞാറക്കല്‍ പോലീസ് അറസ്റ്റ് ചെയ്തു. പളളുരുത്തി തങ്ങള്‍ നഗര്‍ കണ്ടത്തിപ്പറമ്പില്‍ അജ്മല്‍-28, ഇടക്കൊച്ചി പാമ്പായി മൂല മൂലങ്കണ്ണി വീട്ടില്‍ സഫറുദ്ദീന്‍-22,സുല്‍ഫിക്കര്‍-22, പൊക്ലാം പറമ്പില്‍ വിശ്വന്‍ -26 എന്നിവരാണ് അറസ്റ്റിലായത്.
രണ്ടാഴ്ച മുമ്പ് തെക്കന്‍മാലിപ്പുറം സ്വദേശിയായ ഷാനവാസിനെയാണ് സംഘം തട്ടിക്കൊണ്ട് പോയത്. മട്ടാഞ്ചേരി ഭാഗത്ത് വെച്ച് മര്‍ദ്ദിച്ച് അവശനാക്കിയശേഷം വൈപ്പിനിലേക്ക് ഒരു ഓട്ടോയില്‍ കയറ്റി വിടുകയാണ് ചെയ്തത്. ഗുരുതരമായി പരിക്കേറ്റ ഷാനവാസിനെ എറണാകുളും ജനറലാശുപത്രിയിലും പിന്നീട് എറണാകുളത്തെ ഒരു സ്വകാര്യ ആശുപത്രിയിലും പ്രവേശിപ്പിച്ചു. പോലീസ് ഇയാളുടെ മൊഴിയെടുത്തശേഷം തട്ടിക്കൊണ്ട്‌പോയി മര്‍ദ്ദിച്ചതിനു കേസെടുത്തു.
അന്വേഷണത്തില്‍ പള്ളുരുത്തിയില്‍ നിന്ന് എസ്‌ഐ ആര്‍. രഗീഷ് കുമാറും സംഘവുമാണ് പ്രതികളെ അറസ്റ്റ് ചെയ്തത്. പ്രതികളെ കോടതിയില്‍ ഹാജരാക്കി റിമാന്റ് ചെയ്തു. അന്വേഷണ സംഘത്തില്‍ എഎസ്‌ഐ സണ്ണി, സീനിയര്‍ സിപിഒ ഷഹീര്‍, റെനില്‍, സിപിഒ മനോജ്, ബിജു എന്നിവരും ഉണ്ടായിരുന്നു.
പ്രതികരിക്കാൻ ഇവിടെ എഴുതുക: