കാഞ്ഞങ്ങാട്: കാഞ്ഞങ്ങാട് നഗരമധ്യത്തില്‍ വില്‍പ്പന നടത്തിയ കൈലാസ് തിയേറ്റര്‍ സ്ഥിതി ചെയ്തിരുന്ന സ്ഥലത്തിന് പുതിയ അവകാശവാദവുമായി തറവാട്ടംഗം രംഗത്ത് വന്നു. ഇത് വില്‍പ്പന നടത്തിയപ്പോഴാണ് സ്ഥലത്തിന് തനിക്കും അവകാശമുണ്ടെന്നും തന്നെ വഞ്ചിച്ച് ചിലര്‍ പണം കൈക്കലാക്കിയെന്നും ആരോപിച്ച് കര്‍ണ്ണാടക ഉഡുപ്പിയിലെ അന്നപൂര്‍ണ്ണനിലയത്തില്‍ ജാരപ്പയുടെ മകന്‍ പ്രവീണ്‍കുമാറാണ് ഹൊസ്ദുര്‍ഗ് പോലീസില്‍ പരാതി നല്‍കിയത്.
പരാതിയുടെ അടിസ്ഥാനത്തില്‍ ഉച്ചിഷ്ട ദേവസ്ഥാനം പ്രസിഡണ്ട് അറളായിയിലെ പി അച്ചു (74), സെക്രട്ടറി എച്ച് മാധവന്‍ (60), ട്രഷറര്‍ അശോക് കുമാര്‍ (49) എന്നിവര്‍ക്കെതിരെ ഹൊസ്ദുര്‍ഗ് പോലീസ് കേസെടുത്തു. ഹൊസ്ദുര്‍ഗ് ഉച്ചിഷ്ട രക്തേശ്വരി ദേവസ്ഥാനത്തിന്റെ അധീനതയിലുണ്ടായിരുന്ന സ്ഥലമാണ് കൈലാസ് തിയേറ്റര്‍ സ്ഥാപിക്കാനായി വര്‍ഷങ്ങള്‍ക്ക് മുമ്പ് പാട്ടത്തിന് നല്‍കിയത്.
കോടികള്‍ വിലമതിക്കുമായിരുന്ന സ്ഥലം ക്ഷേത്രം ഭാരവാഹികള്‍ തുശ്ചമായ വിലക്ക് വില്‍പ്പന നടത്തിയെന്നാണ് പ്രവീണ്‍ പറയുന്നത്. ആറുകോടി രൂപക്ക് സ്ഥലം വില്‍പ്പന നടത്തിയെന്നാണ് ആധാരത്തിലുള്ളത്. ഇതില്‍ മൂന്നുകോടി രൂപ തിയേറ്റര്‍ ഉടമകള്‍ക്ക് നഷ്ടപരിഹാരമായി നല്‍കി.
അവശേഷിക്കുന്ന തുകക്ക് ക്ഷേത്രത്തിന്റെ അറ്റകുറ്റ പണികള്‍ നടത്തി നവീകരിച്ചു. ബാക്കിയുള്ള തുക ക്ഷേത്രം ഭാരവാഹികള്‍ തന്നിഷ്ടപ്രകാരം ചെലവാക്കിയിരിക്കുകയാണ്. തറവാട്ടംഗമായ തനിക്ക് ഈ സ്വത്തില്‍ അവകാശമുള്ളതിനാല്‍ അര്‍ഹമായ തുക ലഭിക്കണമെന്നാണ് പ്രവീണ്‍ ആവശ്യപ്പെടുന്നത്.
പ്രതികരിക്കാൻ ഇവിടെ എഴുതുക: