പള്‍സര്‍ സുനിയാണ് താരം! അങ്ങനേയും പറയാം. നടി ആക്രമിക്കപ്പെട്ട കേസില്‍ മുഖ്യപ്രതിയായ പള്‍സര്‍ സുനിക്കാണ് ഇപ്പോള്‍ സൂപ്പര്‍ താരങ്ങളേക്കാള്‍ പ്രശസ്തി. കുപ്രസിദ്ധിയാണെങ്കിലും പുള്ളിയെ അറിയാത്തവര്‍ ആരുമില്ല. സിനിമയില്‍ നായകനെപ്പോലെ വില്ലനുമുണ്ടല്ലോ പ്രാധാന്യം.
കേസിലെ ഗൂഢാലോചനക്കാരെ ഇന്നുപിടിക്കും നാളെ പിടിക്കും എന്നൊക്കെ കേള്‍ക്കുന്നതല്ലാതെ ഒരുകാര്യവും നടക്കില്ലെന്നായി ഇപ്പോള്‍ ജനം. നല്ല സ്വാധീനവും പണവുമുള്ള സിനിമാക്കാരെ പോലീസല്ല ആരും തൊടില്ലെന്നാണ് പുറംസംസാരം. വൈകുന്തോറും കേസ് തേഞ്ഞുമാഞ്ഞു പോകുമെന്ന ധാരണയുമുണ്ട്. വലിയ ആള്‍ക്കാര്‍ ബന്ധപ്പെടുന്ന കേസിന്റെ ഗതി നമ്മുടെ നാട്ടില്‍ അങ്ങനെയാണല്ലോ.
ഓരോ ദിവസം ചെല്ലുന്തോറും പള്‍സറിന്റെയും കൂട്ടരുടേയും മുന്നില്‍ പോലീസ് മുട്ടുമടക്കുന്നതായിട്ടാണ് കണ്ടുവരുന്നത്. കാര്യങ്ങള്‍ മാറ്റിമാറ്റിപ്പറഞ്ഞ് കടുവയെ പിടിച്ച കിടുവയാകുകയാണ് പള്‍സര്‍. അതല്ല പേരിനുവേണ്ടി ഇതിനിടയില്‍ പോലീസും കളിക്കുന്നുണ്ടെന്ന ആരോപണവുമുണ്ട്. ഇക്കാര്യത്തെക്കുറിച്ച് മുന്‍ ഡിജിപി സെന്‍കുമാര്‍ തന്നെ പറഞ്ഞതാണ്. നമ്മുടെ പോലീസും വലിയ അഭിനേതാക്കളാണല്ലോ. നല്ല നാലഞ്ചെണ്ണം കൊടുത്താല്‍ പള്‍സര്‍ തത്ത പറയുംപോലെ പറയുന്നവരും കുറവല്ല. പ്രതിയെ തൊട്ടുവണങ്ങലല്ല പോലീസിന്റെ പണിയെന്നാണ് ഇത്തരക്കാര്‍ പറയുന്നത്.
പോലീസ് സത്യം പുറത്തുകൊണ്ടുവന്നില്ലെങ്കില്‍ നടിമാരുടെ പുതിയ സംഘടന നടി ആക്രമിക്കപ്പെട്ട സംഭവത്തെ മുന്‍ നിര്‍ത്തി സിനിമ എടുക്കുമെന്നും അതിലൂടെ യഥാര്‍ഥ വസ്തുതകള്‍ പുറത്തുകൊണ്ടുവരുമെന്നും കേള്‍ക്കുന്നു. എന്തായാലും ഇത്രയ്‌ക്കു പ്രമാദമായൊരു സംഭവം നടന്നതിന്റെ പിന്നിലുള്ളവരെ കണ്ടെത്താനാവാത്തത് കുറഞ്ഞ വാക്കില്‍ പറഞ്ഞാല്‍ നാണക്കേടാണ്. എന്തും തിരക്കഥയാക്കുന്നതാണ് സിനിമാക്കാര്‍.അതിലും വലിയ തിരക്കഥ ഒരുക്കുന്നവരാണ് നമ്മുടെ പോലീസ്.അതിനേയും വെല്ലുന്ന തിരക്കഥയാണോ ക്രിമിനലായ പള്‍സര്‍ സുനി രചിക്കുന്നത്.
പ്രതികരിക്കാൻ ഇവിടെ എഴുതുക: