ശ്രീനിവാസ്
വാഷിങ്ടണ്: വംശവെറി മൂത്ത അമേരിക്കക്കാരന് ഇന്ത്യന് എഞ്ചിനീയറെ വെടിവച്ച് കൊന്നു. ആന്ധ്ര സ്വദേശി ശ്രീനിവാസ് കുച്ചിഭോട്ലയാണ് കൊല്ലപ്പെട്ടത്. മുന്സൈനികന് ആദം പ്യൂരിന്റണാണ് കൊലയാളി.
കന്സാസിലെ ഒലാതിലെ ബാറില് വ്യാഴാഴ്ച പ്രാദേശിക സമയം വൈകിട്ട് ഏഴരയ്ക്കാണ് സംഭവം. ജിപിഎസ് വികസിപ്പിക്കുന്ന ഗാര്മിന് കമ്പനിയിലെ ഉദ്യോഗസ്ഥനായിരുന്നു ശ്രീനിവാസ്. ഒപ്പമുണ്ടായിരുന്ന സഹപ്രവര്ത്തകന് ഇന്ത്യക്കാരന് അലോക് മദസാനിക്കും, ഇവരെ രക്ഷിക്കാന് ശ്രമിച്ച യുഎസ് പൗരന് അയാന് ഗ്രില്ലോട്ടിനും വെടിയേറ്റു.
ശ്രീനിവാസും, അലോകും ഓസ്റ്റിന് ബാറില് ഇരിക്കുമ്പോള് ആദം പ്യുരിന്റണ് കടന്നെത്തി എന്റെ രാജ്യത്ത് നിന്ന് ഇറങ്ങാന് ആക്രോശിച്ച് വെടിയുതിര്ത്തു. ശ്രീനിവാസ് സംഭവസ്ഥലത്ത് മരിച്ചു. മറ്റു രണ്ടുപേരും ചികിത്സയിലാണ്. ആക്രമണത്തിനു ശേഷം കടന്നുകളഞ്ഞ പ്യുരിന്റണിനെ ഏഴ് മണിക്കൂറിനു ശേഷം മിസൗറിയില് നിന്ന് അറസ്റ്റ് ചെയ്തു. താന് രണ്ട് മധ്യേഷ്യക്കാരെ വെടിവച്ച് കൊന്നതായി ഇയാള് പോലീസിനോട് സമ്മതിച്ചു.
മൂന്നു വര്ഷമായി ശ്രീനിവാസ് ഭാര്യയ്ക്കൊപ്പം യുഎസിലാണ്. സഹപ്രവര്ത്തകരോടും അയല്വാസികളോടും ഏറെ അടുപ്പത്തിലായിരുന്നു ശ്രീനിവാസെന്നും ജോലിയോട് ഏറെ ആത്മാര്ത്ഥയും ഉത്തരവാദിത്ത്വവും പുലര്ത്തിയിരുന്നവെന്നും ഗാര്മിന് മേധാവി റോഡ് ലാര്സണ് പറഞ്ഞു. ഹെദരാബാദ് ജവഹര്ലാല് നെഹ്റു സാങ്കേതിക സര്വകലാശാലയില് നിന്നുള്ള ബിരുദധാരിയായ ശ്രീനിവാസ് യുഎസിലെ ടെക്സാസ് സര്വകലാശാലയില് നിന്ന് ഇലക്ടോണിക് എന്ജിനീയറിങ്ങില് ബിരുദാനന്തര ബിരുദം നേടി. അതിനുശേഷം 2007ല് റിസര്ച്ച് അസിസ്റ്റന്റായും ജോലി ചെയ്തു.
അലോക് വസാവി എഞ്ചിനീയറിങ് കോളേജില് നിന്നു ബിരുദം നേടിയ ശേഷം, മിസൗറി കന്സാസ് സര്വകലാശാലയില് നിന്നു ബിരുദാനന്തര ബിരുദം നേടിയിട്ടുണ്ട്. കന്സാസിലെ സംഭവം ഞെട്ടലുളവാക്കുന്നുവെന്നും ശ്രിനീവാസിന്റെ ഹൈദരാബാദിലുള്ള അച്ഛനെയും സഹോദരനേയും ഫോണില് വിളിച്ച് അനുശോചനം അറിയിച്ചതായും വിദേശമന്ത്രി സുഷമ സ്വരാജ് ട്വിറ്ററിലൂടെ അറിയിച്ചു. സംഭവത്തെ അപലപിച്ച് ഇന്ത്യയിലെ യുഎസ് അംബാസഡര് മേരി കേ ലോസ് കാള്സണും ട്വീറ്റ് ചെയ്തു.
