റിപ്പോ നിരക്കില്‍ മാറ്റം വരുത്താതെ ആര്‍ബിഐ

ന്യൂദല്‍ഹി: ആര്‍ബിഐ പുതിയ വായ്പാ നയം പ്രഖ്യാപിച്ചു. റിപ്പോ നിരക്കുകളില്‍ മാറ്റം വരുത്തിയിട്ടില്ല. 6.25 ശതമാനമായിരുന്നറിപ്പോ അങ്ങനെ തന്നെ നിലനിര്‍ത്തി. എന്നാല്‍ റിവേഴ്‌സ് റിപ്പോ (ബാങ്കുകള്‍ ആര്‍ബിഐയില്‍ നിക്ഷേപിക്കുന്നതിനുള്ള പലിശ) നിരക്ക് 5.25 ശതമാനമായിരുന്നത് 6 ശതമാനമാക്കി ഉയര്‍ത്തിയിട്ടുണ്ട്.

ചെറുകിട ഉപഭോക്തൃ വിലയിലുണ്ടായ വര്‍ധനവാണ് റിപ്പോ നിരക്ക് നിലനിര്‍ത്താന്‍ കാരണം. നോട്ട് അസാധുവാക്കലിനെ തുടര്‍ന്ന് മൊത്ത വില നിരക്കില്‍ 3.38 ശതമാനം താഴ്‌ച്ചയുണ്ടായെങ്കിലും ഫെബ്രുവരിയില്‍ അത് 6.55 ശതമാനമായി തിരിച്ചുപിടിച്ചു.

2017-18 ആദ്യ പകുതിയില്‍ നാണയപ്പെരുപ്പം 4.5 ശതമാനമാവും, രണ്ടാമത്തേതില്‍ 5 ശതമാനമാവുമെന്നാണ് പ്രതീക്ഷിക്കുന്നതെന്നും ആര്‍ബിഐയുടെ നയ അവലോകനത്തില്‍ പറയുന്നുണ്ട്. ഇന്ത്യയുടെ സാമ്പത്തിക വളര്‍ച്ച 2017-18ല്‍ 7.4 ശതമാനമായി ഉയരുമെന്ന് ഏഷ്യന്‍ ഡവലപ്‌മെന്റ് ബാങ്ക് കഴിഞ്ഞ ദിവസം പുറത്തുവിട്ട പഠനത്തില്‍ പറയുന്നുണ്ട്.

അടുത്ത സാമ്പത്തിക വര്‍ഷം ഇത് 7.6 ശതമാനമാവും. അതേസമയം റിപ്പോ നിരക്കില്‍ മാറ്റം വരുത്താത്തത് ഭവന വായ്പാ നിരക്ക് കുറയ്‌ക്കുമെന്നാണ് സാമ്പത്തിക വിദഗ്ധര്‍ അഭിപ്രായപ്പെടുന്നത്.