കുന്നത്തൂര്: ചക്കുവള്ളി പരബ്രഹ്മക്ഷേത്രഭൂമിയില് സിപിഎം ഭീഷണിയില് പോലീസ് കയ്യേറ്റക്കാരെ വീണ്ടും കുടിയിരുത്തിയത് ഭക്തജനങ്ങളെ വെല്ലുവിളിച്ച്. കയ്യേറ്റത്തിനെതിരെ നാല് പതിറ്റാണ്ട് കേസ് പറഞ്ഞ് നേടിയ വിജയത്തെയാണ് പോലീസും ജില്ലാഭരണകൂടവും ചേര്ന്ന് അട്ടിമറിക്കാന് ശ്രമിക്കുന്നതെന്ന് വിമര്ശനമുയരുന്നു.
കയ്യേറ്റമൊഴിപ്പിക്കലാണ് സര്ക്കാര് നയമെന്ന് പറയുമ്പോഴും ദേവസ്വംഭൂമി കയ്യേറ്റക്കാര്ക്ക് പതിച്ച് നല്കാനുള്ള ആസൂത്രിത നീക്കമാണ് ചക്കുവള്ളിയില് നടക്കുന്നത്. സിപിഎമ്മിന്റെയും ജില്ലാഭരണകൂടത്തിന്റെയും കയ്യേറ്റഅനുകൂല നിലപാടുകള് തുറന്നുകാട്ടി വാഹനപ്രചരണജാഥയടക്കമുള്ള പ്രതിഷേധപരിപാടികള്ക്ക് തയ്യാറെടുക്കുകയാണ് ഹിന്ദുസംഘടനകള്.
സിപിഎം രാജ്യസഭാംഗമായ സോമപ്രസാദ്, ജില്ലാപഞ്ചായത്ത് വൈസ്പ്രസിഡന്റ് എം. ശിവശങ്കരപ്പിള്ള, മുതിര്ന്ന നേതാവ് ഗംഗാധരക്കുറുപ്പ് എന്നിവരുടെ നേതൃത്വത്തില് വൈരാഗ്യബുദ്ധിയോടെയാണ് കയ്യേറ്റമൊഴിപ്പിക്കലിനെ സിപിഎം എതിര്ത്തത്. ക്ഷേത്രഭൂമിയിലെ കയ്യേറ്റക്കടകള് ഒഴിയാന് ഹൈക്കോടതി നല്കിയ അന്ത്യശാസനം നടപ്പാക്കാനെത്തിയ റവന്യൂ, പോലീസ് ഉദ്യോഗസ്ഥരെ സോമപ്രസാദും കൂട്ടരും നേരിട്ടെത്തി തടയുകയായിരുന്നു.
കയ്യേറ്റക്കാരില് പലരും ഒഴിയാന് സ്വമേധയാ തയ്യാറായിട്ടും പ്രദേശത്തെ ചില എസ്ഡിപിഐ നേതാക്കന്മാര്ക്കൊപ്പം നിന്ന് കോടതിനിര്ദേശത്തെയും ക്ഷേത്രവിശ്വാസികളെയും വെല്ലുവിളിക്കുകയായിരുന്നു സിപിഎം. മുപ്പത് ദിവസത്തിനുള്ളില് കയ്യേറ്റങ്ങള് സ്വയം ഒഴിയുമെന്ന് സത്യവാങ്മൂലം നല്കിയതിന്റെ അടിസ്ഥാനത്തില് കോടതി അത്രയും സമയം കൂടി അനുവദിക്കുകയായിരുന്നു.
ഇതംഗീകരിച്ച ഹിന്ദുസംഘടനകളും ക്ഷേത്രഭൂമി സംരക്ഷണസമിതിയും ഈ കാലാവധി തീരുന്നതുവരെ സത്യാഗ്രഹസമരം നടത്തി. എന്നാല് ഇതിനിടയില് സുപ്രീംകോടതിയെ സമീപിച്ച കയ്യേറ്റക്കാര് ഹൈക്കോടതി വിധി റദ്ദാക്കണമെന്ന് ആവശ്യപ്പെടുകയായിരുന്നു. കയ്യേറ്റമൊഴിയാന് ആറ് മാസം കൂടി സമയം സുപ്രീംകോടതി നല്കി. ചക്കുവള്ളിയില് വര്ഗീയ സംഘര്ഷം സൃഷ്ടിക്കാനുള്ള സിപിഎം നീക്കം ഹൈന്ദവസംഘടനാ നേതാക്കളുടെ സംയമനപൂര്വമായ ഇടപെടലില് തകര്ന്നു.
കോടതിയെ സമീപിക്കാത്ത കയ്യേറ്റങ്ങള് പൊളിച്ചുനീക്കാനും കോടതി ഉത്തരവില് വ്യക്തത വരുന്നതുവരെ കടകള് തുറക്കരുതെന്നും അധികൃതരുമായുള്ള ചര്ച്ചയില് തീരുമാനമായി. എന്നാല് സുപ്രീംകോടതിയില് കയ്യേറ്റക്കടകള് തുടരുന്നതില് തങ്ങള്ക്കെതിര്പ്പില്ലെന്ന ക്ഷേത്രവിരുദ്ധ നിലപാടാണ് സര്ക്കാര് സ്വീകരിച്ചത്.
വേനലവധിക്ക് ശേഷം കോടതി നടപടികള് ആരംഭിക്കാനിരിക്കെയാണ് കഴിഞ്ഞദിവസം സിപിഎം നിര്ദേശം പാലിച്ച് പോലീസ് കയ്യേറ്റക്കാര്ക്ക് സംരക്ഷണമൊരുക്കിയത്. കയ്യേറ്റക്കാര്ക്കൊപ്പം ചേര്ന്ന പോലീസും അധികൃതരും ഭക്തജനങ്ങളുടെ പ്രതിഷേധത്തെ അടിച്ചമര്ത്താന് ശ്രമിക്കുകയായിരുന്നു.
