ശിവഗിരി: ഗുരുദേവ പ്രതിഷ്ഠ കനക ജൂബിലി ആഘോഷപരിപാടികളുടെ ഉദ്ഘാടനം മെയ് 7ന് ശിവഗിരിയില് നടക്കമെന്ന് ആഘോഷ കമ്മിറ്റി സെക്രട്ടറി സ്വാമി സച്ചിതാനന്ദ പത്രസമ്മേളനത്തില് അറിയിച്ചു. പരിപാടികള് 2018 ജനുവരി~ഒന്നിന് സമാപിക്കും. ഇതോടനുബന്ധിച്ച് രാജ്യമൊട്ടാകെ ആയിരം പ്രാര്ത്ഥനാ യോഗങ്ങള് സംഘടിപ്പിക്കും.
തിരുവനന്തപുരം, കൊച്ചി, മലബാര് എന്നീ കേന്ദ്രങ്ങളില് ഗുരുദേവന്റെ വിശ്വ മാനവിക തത്വദര്ശനത്തെ ആസ്പദമാക്കി ഏകദിന മേഖല സെമിനാറുകള് സംഘടിപ്പിക്കും.
ദല്ഹി, മുംബൈ, കല്ക്കട്ട, അഹമ്മദാബാദ്, പൂനെ, ഭിലായ്, ചെന്നൈ, ബാംഗ്ലൂര്, കോയമ്പത്തൂര് തുടങ്ങി വന്നഗരങ്ങള് കേന്ദ്രമാക്കി 51 ദേശീയ സമ്മേളനങ്ങള് നടക്കും. ഒക്ടോബര് 1, 2 തീയതികളില് ശിവഗിരിയില് ശ്രീനാരായണീയ പ്രസ്ഥാനങ്ങളുടെ സംഗമം നടക്കും.
ഇതോടനുബന്ധിച്ച് ശിവഗിരിയില് കനകജൂബിലി സ്മാരക ശാന്തിമന്ദിര നിര്മ്മാണത്തിന് തുടക്കമിടും. ലോകത്തിന്റെ നാനാഭാഗങ്ങളില് ശ്രീനാരായണ പ്രസ്ഥാനം നിലകൊള്ളുന്ന രാജ്യങ്ങളിലെല്ലാം ആഘോഷ പരിപാടികള് സംഘടിപ്പിക്കും. മഹാസമാധിയില് ഗുരുദേവന്റെ വിഗ്രഹം പ്രതിഷ്ഠിച്ച ജനുവരി 1ന് പുലര്ച്ചെ വിശ്വശാന്തി യഞ്ജവും മഹാഗുരുപൂജയും സമൂഹാര്ച്ചനയും നടക്കും.
പത്രസമ്മേളനത്തില് ധര്മ്മസംഘം ട്രസ്റ്റ് പ്രസിഡന്റ് സ്വാമി വിശുദ്ധാനന്ദ, ജനറല് സെക്രട്ടറി സ്വാമി സാന്ദ്രാനന്ദ, ട്രഷറര് സ്വാമി ശാരദാനന്ദ, കനക ജൂബിലി ആഘോഷ കമ്മിറ്റി മുഖ്യ രക്ഷാധികാരി സ്വാമി പ്രകാശാനന്ദ, സ്വാമി വിശാലാനന്ദ, സ്വാമി ഗുരുപ്രസാദ്, സ്വാമി ധര്മ്മ ചൈതന്യ, മീഡിയ കമ്മിറ്റി ചെയര്മാന് ഡോ.എം. ജയരാജ് എന്നിവരും പങ്കെടുത്തു.
