ന്യൂദല്ഹി: പാക് ചാരസംഘടനയായ ഐഎസ്ഐയുടെ ലഫ്. കേണല് റാങ്കിലുള്ള ഉദ്യോഗസ്ഥനെ കാണാതായെന്ന് പരാതി. നേപ്പാളിലെ ലുംബിനിയില് വച്ച് കാണാതായ മുഹമ്മദ് ഹബീബ് സഹീറിനെ റോ തട്ടിക്കൊണ്ടുപോയതാണെന്ന് പാക് മാധ്യമങ്ങള് റിപ്പോര്ട്ട് ചെയ്തു.
കുല്ഭൂഷണ് ജാദവിന് വധശിക്ഷ വിധിച്ച പാക് നടപടിക്ക് തിരിച്ചടിയായി ഇന്ത്യന് രഹസ്യാന്വേഷണ ഏജന്സികളാണ് ഐഎസ്ഐയുടെ മുതിര്ന്ന ഉദ്യോഗസ്ഥനെ തട്ടിക്കൊണ്ടുപോയതെന്നും റിപ്പോര്ട്ടുകളില് പറയുന്നു.
നേപ്പാള് കേന്ദ്രീകരിച്ച് ഐഎസ്ഐക്ക് വേണ്ടി പ്രവര്ത്തിക്കുയായിരുന്നു പാക് സൈന്യത്തിലെ ലഫ്. കേണല് (റിട്ട.) ഉദ്യോഗസ്ഥനായ സഹീറെന്നാണ് സൂചന. സഹീറിന്റെ മകന് റാവല്പിണ്ടിയിലെ റാവത്ത് പോലീസ് സ്റ്റേഷനില് അച്ഛനെ കാണാനില്ലെന്ന് പരാതി നല്കി. പാക് കരസേനയിലെ ആര്ട്ടിലറി റജിമെന്റിലെ ലഫ്. കേണലായിരുന്ന സഹീര് ജോലിയില് നിന്ന് വിരമിച്ചെന്നാണ് ഔദ്യോഗിക രേഖകള്. എന്നാല്, ഇയാള് 2014 മുതല് ഐഎസ്ഐക്കായി നേപ്പാള് കേന്ദ്രീകരിച്ച് ഇന്ത്യയില് ചാരപ്രവര്ത്തനത്തിന് നേതൃത്വം നല്കുകയായിരുന്നെന്നാണ് സൂചന.
നേപ്പാളില് ഒരു കണ്സല്റ്റന്സി കമ്പനിയുടെ ചുമതലക്കാരനായി പ്രവര്ത്തിക്കുകയാണ് പിതാവ് സഹീര് എന്നു മാത്രമാണ് കുടുംബത്തിന് അറിയാവുന്നത്. ഏപ്രില് ആറിന് കാഠ്മണ്ഡു എയര്പോര്ട്ടില് എത്തിയ സഹീര് ലുംബിനിയിലേക്ക് പോയെന്നും കുടുംബത്തിന് വിവരം ലഭിച്ചിട്ടുണ്ട്.
ഇന്ത്യന് രഹസ്യാന്വേഷണ ഏജന്സികളാണ് സഹീറിനെ ചോദ്യം ചെയ്യുന്നതിനായി കസ്റ്റഡിയിലെടുത്തതെങ്കില് ഐഎസ്ഐയുമായി ബന്ധപ്പെട്ട നിരവധി രഹസ്യ വിവരങ്ങള് ലഭിക്കുമെന്നുറപ്പാണെന്ന് മുന് റോ അഡീഷണല് സെക്രട്ടറി ജയദേവ് റാനഡെ പ്രതികരിച്ചു.
