കൊട്ടിയം: സിപിഐ-സിപിഎം സംഘര്ഷം നടന്ന മുഖത്തലയില് വീണ്ടും അക്രമം ഉണ്ടാകുമെന്ന് പോലീസ് രഹസ്യാന്വേഷണ വിഭാഗം റിപ്പോര്ട്ട്. ഇപ്പോഴും പ്രദേശത്ത് സംഘര്ഷാവസ്ഥ നിലനില്ക്കുകയാണ്. മുഖത്തല ശ്രീകൃഷ്ണസ്വാമി ക്ഷേത്രത്തിലെ ഉത്സവം ആരംഭിച്ചതോടെ പോലീസ് ജാഗ്രത പുലര്ത്തണമെന്നാണ് രഹസ്യാന്വേഷണ വിഭാഗം മുന്നറിയിപ്പ് നല്കിയിരിക്കുന്നത്.
അതേസമയം കഴിഞ്ഞ ദിവസം പ്രദേശത്ത് വീണ്ടും സംഘര്ഷാവസ്ഥ ഉണ്ടായി. ഡിവൈഎഫ്ഐക്കാര് പോസ്റ്റര് പതിക്കാന് ശ്രമിച്ചത് സിപിഐക്കാര് ചോദ്യം ചെയ്തതാണ് സംഘര്ഷാവസ്ഥ സൃഷ്ടിച്ചത്. മുഖത്തല നിവാസികളുടെ പ്രധാനപ്പെട്ട ഉത്സവം നടക്കുന്ന വേളയില് പ്രദേശത്ത് സംഘര്ഷാവസ്ഥ സൃഷ്ടിക്കുന്ന ഇടതുപാര്ട്ടി പ്രവര്ത്തകരെ ഭീതിയോടെയാണ് ജനം നോക്കി കാണുന്നത്. ഉത്സവം അലങ്കോലപ്പെടുത്തരുതെന്ന ആവശ്യവുമായി ഭക്തജനങ്ങളും രംഗത്ത് എത്തിയിട്ടുണ്ട്. ജില്ലയിലെ പ്രധാന ഉത്സവങ്ങളിലൊന്നാണ് മുഖത്തല ഉത്സവം. ആയിരക്കണക്കിന് ഭക്തര് ഉത്സവദിവസം ഇവിടെ എത്തിച്ചേരും. അന്ന് സംഘര്ഷം ഉണ്ടായാല് പോലീസിന് പോലും അത് നിയന്ത്രിക്കാന് സാധിക്കില്ല. അതിനാല് മുന്കരുതല് എടുക്കണമെന്ന നിര്ദ്ദേശമാണ് ഇപ്പോള് ഉന്നത പോലീസ് ഉദ്യോഗസ്ഥര്ക്ക് രഹസ്യാന്വേഷണവിഭാഗം റിപ്പോര്ട്ട് നല്കിയിരിക്കുന്നത്. ഇപ്പോള് പ്രദേശത്ത് ഏര്പ്പെടുത്തിയിരിക്കുന്ന പോലീസ് കാവല് കൂടുതല് ശക്തമാക്കണമെന്ന നിര്ദ്ദേശവും റിപ്പോര്ട്ടിലുണ്ട്.
