കുന്നത്തൂര്: അശ്രദ്ധമായി മൊബൈല്ഫോണില് സംസാരിച്ചുകൊണ്ടുവരവേ സ്വകാര്യബസിനടിയില്പ്പെട്ട ബൈക്ക് യാത്രികനായ യുവാവ് അത്ഭുതകരമായി രക്ഷപ്പെട്ടു. കുന്നത്തൂര് ഐവര്കാല പുത്തനമ്പലം ലക്ഷംവീട്കോളനി സ്വദേശിയായ യുവാവാണ് നിസാരപരിക്കോടെ രക്ഷപ്പെട്ടത്. ഇന്നലെ രാവിലെ എട്ടോടെ കുന്നത്തൂര് കടമ്പനാട് റോഡില് വേമ്പനാട്ടഴികത്ത് മുക്കിന് സമീപമുള്ള വളവിലായിരുന്നു സംഭവം.
പത്തനംതിട്ട-കുണ്ടറ റൂട്ടില് സര്വീസ് നടത്തുന്ന ലക്ഷ്മി എന്ന സ്വകാര്യബസിന്റെ പിന്ചക്രങ്ങളുടെ അടിയിലേക്ക് ബൈക്ക് കയറുകയായിരുന്നു. ബസ് കടമ്പനാട്ടേക്കും ബൈക്ക് പുത്തനമ്പലത്തേക്കും വരികയായിരുന്നു. ബസ് പെട്ടെന്ന് ബ്രേക്കിട്ട് നിര്ത്തിയതിനാല് ബൈക്കിനുമുകളിലൂടെ കയറിയിറങ്ങിയില്ല. ഇതിനാലാണ് തലനാരിഴയ്ക്ക് ദുരന്തം ഒഴിവായത്.
ബൈക്കിനും കേടുപാടുകള് സംഭവിച്ചിട്ടില്ല. അപകടത്തെതുടര്ന്ന് ഇതുവഴിയുളള ഗതാഗതം ഏറെനേരം തടസപ്പെട്ടു. സംഭവം അറിഞ്ഞ് ശാസ്താംകോട്ട പോലീസും സ്ഥലത്തെത്തിയിരുന്നു.
