തൃശൂര്: പതികാലത്തില് തുടങ്ങി, ആസ്വദകനെ മേളഗോപുരത്തിന്റെ പരകോടിയിലെത്തിക്കുന്ന പാണ്ടിമേളം. പാണ്ടിമേളത്തിന്റെ രൗദ്രതാളമുയരുമ്പോള്, മീനച്ചൂടിനെ വകവയ്ക്കാതെ ആടിയുലയുന്ന പതിനായിരങ്ങള്. തൃശൂര് പൂരത്തിന്റെ വിശ്വപ്രസിദ്ധമായ ഇലഞ്ഞിത്തറമേളം.
പാറമേക്കാവ് വിഭാഗമാണ് ഇലഞ്ഞിത്തറമേളം അവതരിപ്പിക്കുന്നത്. പൂരം കാണാനുള്ളതു മാത്രമല്ല, കേള്ക്കാനുള്ളത് കൂടിയാവുന്നത് ഈ മേളഗോപുരങ്ങള് തീര്ക്കുമ്പോഴാണ്. ഇലഞ്ഞിച്ചോട്ടില് തീര്ക്കുന്ന നാദവിസ്മയം. അതാണ് ഇലഞ്ഞിത്തറ മേളം.
രണ്ടരമണിക്കൂര് നീളുന്ന മേളം സമാപിക്കുമ്പോഴേക്കും നാദത്തിന്റെ ദീപ്തഗോപുരം പണിതുയര്ത്തിക്കഴിഞ്ഞിരിക്കും. ജനലക്ഷങ്ങളെ ആഹ്ളാദ നിര്വൃതിയില് ആറാടിച്ച്…! പെരുവനം കുട്ടന് മാരാരാണ് ഇത്തവണയും ഇലഞ്ഞിത്തറമേളത്തിന്റെ പ്രമാണം വഹിക്കുന്നത്.
ക്ഷേത്ര മതില്ക്കകത്ത് പാണ്ടി പാടില്ലെന്നാണ് വിധി. തൃശൂര്പൂരം മാത്രമാണ് ഇതിന് അപവാദം. വടക്കുന്നാഥ ക്ഷേത്ര മതില്ക്കകത്തെ ഇലഞ്ഞിച്ചുവട്ടിലാണ് ഈ മേളം അരങ്ങേറുന്നത്.
മുന്നൂറിലേറെ കലകാരന്മാരാണ് ഈ ‘ഓര്ക്കസ്ട്ര’യില് അണിനിരക്കുക…!ആദ്യ കോല് ഒലുമ്പുമ്പോള് ഗൃ…ധീം…പതിന്നാലിന്റെ ഇടവേളകളില് കുറുങ്കുഴല് നാദം നിറയും. വീണ്ടും ഒരു ഗൃ…ധീം…
ഇടവേളകള് ചുരുങ്ങി വന്ന് സാവധാനം വിളംബകാലത്തിലേക്ക് കടക്കുന്നു. മേളത്തിന്റെ ആദ്യകാലമാണ് പതികാലം. നാല് കലാശമാണ് മേളത്തിലുടനീളം. നാലാം കാലത്തോടെ ആദ്യകലാശമായ നില. ഇതിലെ അക്ഷരങ്ങള് ‘തകിട’. നില സമാപിക്കുന്നതോടെ താളവട്ടം ആരംഭിക്കുന്നു.
ഓരോ കാലത്തിനും മുറുക്കം കൂടിവരും. രണ്ടാം ഘട്ടം ‘തുറന്നുപിടിയ്ക്കല്’. ഇവിടെ കുറച്ചു കലാശങ്ങള് കഴിയുന്നതോടെ മേളം മൂന്നാം ഘട്ടത്തിലേക്ക് പ്രവേശിക്കുകയായി. അതാണ് ‘എടുത്തുകലാശം’.
ഇവിടെയും ആവശ്യമുള്ള കലാശങ്ങള് കഴിയുമ്പോള് മേളം നാലാം ഘട്ടത്തിലേക്ക് കടക്കുന്നു. നാലാം ഘട്ടം ‘അടിച്ചു കലാശ’മാണ്. ഈ ഘട്ടത്തില് കൊട്ട് ഏറെ ശക്തി പ്രാപിക്കുന്നു.
ഇതിന്റെ അന്ത്യത്തില് മേളത്തിന്റെ സമാപനമായ നാലാം ഘട്ടമായി. ഇതിന് ‘കൂട്ടിത്തട്ട്’ എന്ന് പേര്. ഇവിടെയും നിശ്ചിത കാലങ്ങള് കഴിഞ്ഞശേഷം അവസാനത്തേയും അഞ്ചാമത്തേയും ഘട്ടത്തിലേക്ക് പ്രവേശിക്കുന്നു.
പതിഞ്ഞ ത്രിപുടയുടെ രണ്ടാം ഘട്ടത്തില് നില കലാശിക്കുമ്പോള് മുന്നിരക്കാര് ചെണ്ടയില് കനത്ത നാദമാണ് പടുത്തുയര്ത്തുക. ചെണ്ട, കാല്മുട്ടുകൊണ്ടു താങ്ങിയാണ് ഈ കലാശമെന്നതിനാല് ‘മുട്ടിന്മേല് കയറിയ കാലം’ എന്നും പറയുന്നു.
മൂന്നാംഘട്ടതതിന്റെ നാലാം ഭാഗത്തെത്തുമ്പോള്, പതിന്നാന് അക്ഷരമുള്ള ‘നില’ ആരംഭിക്കുന്നു… ‘തകിര്തകിര്ത’ എന്നിങ്ങനെ. ഇതിന്റെ അന്ത്യത്തില് മേളത്തിന്റെ സമാപനമായ നാലാം ഘട്ടമായി.
ഇതിന് ‘കൂട്ടിത്തട്ട്’ എന്ന് പേര്. ഇവിടെ നിശ്ചിത കാലങ്ങള് കൊട്ടുന്നതോടെ മേളം അപരിമേയമായ മേളഗോപുരമായി മാറുന്നു. തുടര്ന്ന് ‘തീരുകലാശവും’ കൊട്ടിത്തീര്ക്കുന്നതോടെ പതിനായിരങ്ങള് ആനന്ദപരകോടിയിലേക്കിയരുന്ന ഇലഞ്ഞിത്തറമേളത്തിന് പരിസമാപ്തിയാകുന്നു.
