കുളമാവ്: വനത്തിനുള്ളില് കടുവകളുടെ കണക്കെടുപ്പിനായി സ്ഥാപിച്ച വനംവന്യജീവി വകുപ്പ് സ്ഥാപിച്ച കാമറകള് കാണാതായി. തൊടുപുഴ ഡിവിഷന് കീഴില് വരുന്ന കുളമാവ് വലിയമാവ് മേഖലയില് നിന്നാണ് രണ്ട് കാമറകള് കാണാതായത്. 5 ദിവസം മുമ്പാണ് ഇവിടെ കാമറ സ്ഥാപിച്ചത്. ഇന്നലെ ഇതിന്റെ വിശദാംശങ്ങള് എടുക്കാനായി എത്തിയപ്പോഴാണ് കാമറകള് കാണാതായതായി വ്യക്തമാകുന്നത്. തുടര്ന്ന് വനംവകുപ്പ് കുളമാവ് പോലീസില് പരാതി നല്കുകയായിരുന്നു.
4 പെയറുകളായി 8 കാമറകളാണ് കടുവകള് സാധാരണയായി എത്തുന്ന പാതകളില് സ്ഥാപിച്ചിരുന്നത്. മുഖത്തോട് മുഖമായി രണ്ട് കാമറകള് എന്ന കണക്കിനാണ് ഇവ സ്ഥാപിക്കുക. ഉദ്ദേശം 20000 രൂപ വിലവരുന്ന കാമറകള് പറമ്പികുളത്ത് നിന്നും എത്തിച്ചവയാണ്. സംഭവത്തില് മോഷ്ടാവിനെതിരെ കേസെടുത്തതായി തൊടുപുഴ റേഞ്ച് ഫോറസ്റ്റ ്ഓഫീസര് കെ എന് ബാബു പറഞ്ഞു. വന്യജീവി സങ്കേതത്തില് അനുമതിയില്ലാതെ പ്രവേശിക്കുന്നത് കുറ്റകരമെന്ന വകുപ്പ് പ്രകാരമാണ് കേസെടുത്തത്. കഴിഞ്ഞ 17 ന് മറയൂര് റേഞ്ചിന് കീഴില് വരുന്ന ആനമുടി ഷോല പാര്ക്കിലെ പെരുഞ്ചോല എന്ന സ്ഥലത്ത് നിന്നും ഇത്തരത്തില് 2 കാമറകള് മോഷണം പോയിരുന്നു. അതിര്ത്തി മേഖലയില് നിന്ന് കാമറകള് പോയതിനാല് അന്വേഷണം ഒരാഴ്ച പിന്നിട്ടിട്ടും എങ്ങും എത്തിയിട്ടില്ല.
കുളമാവിലെ മോഷണത്തില് കേസെടുത്തതായും വനത്തിലെത്തി സംഭവത്തില് പരിശോധന നടത്തുമെന്നും പോലീസ് അറിയിച്ചു.
