തിരുവനന്തപുരം: ശ്രീകണ്ഠേശ്വരം ക്ഷേത്രത്തില് വര്ഷങ്ങളായി നടന്നുവരുന്ന മഹാരുദ്ര യജ്ഞം തകര്ക്കാന് സിപിഎം – ഡിവൈഎഫ്ഐ ഗുണ്ടാസംഘത്തിന്റെ ശ്രമം. നേരത്തെ ശിവരാത്രി ദിനത്തില് ശ്രീകണ്ഠേശ്വരത്ത് സംഘര്ഷം സൃഷ്ടിക്കാനുള്ള സിപിഎം-ഡിവൈഎഫ്ഐ ശ്രമം ഭക്തജനങ്ങളുടെയും ഹിന്ദുസംഘടനകളുടെയും ആത്മസംയമനം മൂലം പരാജയപ്പെട്ടിരുന്നു. ക്ഷേത്രാചാരങ്ങള് തടസ്സപ്പെടുത്താനുള്ള അവിശ്വാസികളുടെ ശ്രമങ്ങള്ക്കെതിരെ പ്രദേശത്ത് ശക്തമായ ഭക്തജന പ്രതിഷേധം ഉയര്ന്നിരിക്കുകയാണ്.
എല്ലാവര്ഷവും ഇവിടെ വിശേഷദിവസങ്ങളില് ക്ഷേത്രസംരക്ഷണസമിതി ശ്രീകണ്ഠേശ്വരം ശാഖയുടെ ആഭിമുഖ്യത്തില് കൊടിതോരണങ്ങള് കെട്ടി അലങ്കരിക്കുക പതിവാണ്. ഇതിന്റെ ഭാഗമായി പതിറ്റാണ്ടുകളായി കാവിക്കൊടികളും കെട്ടാറുണ്ട്. എന്നാല് സമീപകാലത്തുണ്ടായ ഭരണമാറ്റത്തിന്റെ തണലില് ഇതിനെതിരെ പ്രദേശത്തെ സിപിഎം-ഡിവൈഎഫ്ഐ ഗുണ്ടകള് രംഗത്തെത്തി. വിശേഷദിവസങ്ങളില് മനഃപ്പൂര്വം സംഘര്ഷം സൃഷ്ടിക്കാന് സമിതിയുടെ കൊടികള് നശിപ്പിക്കുകയും ഡിവൈഎഫ്ഐ കൊടികള് കെട്ടുകയും ചെയ്യാറുണ്ട്. ശിവരാത്രി ദിനത്തില് ഭക്തജനങ്ങള് നോക്കിനില്ക്കെ കാവിക്കൊടികള് വലിച്ചുകീറി ഡിവൈഎഫ്ഐ കൊടികള് കെട്ടിയത് വലിയ സംഘര്ഷത്തില് കലാശിക്കുമായിരുന്നു. ഭക്തജനങ്ങളും ഹിന്ദുസംഘടനകളും തികഞ്ഞ ആത്മസംയമനം പാലിച്ചതിനാല് കുഴപ്പങ്ങള് ഒഴിവായി.
ശ്രമം പരാജയപ്പെട്ടതോടെ മഹാരുദ്ര യജ്ഞം കലക്കാനുള്ള നീക്കവുമായി ഡിവൈഎഫ്ഐ ഗുണ്ടകള് വീണ്ടും രംഗത്തെത്തി. ക്ഷേത്രവിശ്വാസവുമായോ ചടങ്ങുകളുമായോ ഒരുതരത്തിലും ബന്ധപ്പെടാത്ത നിരീശ്വരവാദികളായവര് കൊടികെട്ടാനും സംഘര്ഷമുണ്ടാക്കാനും നീക്കം നടത്തുന്നത് എന്തിനാണെന്ന് ഭക്തജനങ്ങള് ചോദിക്കുന്നു. ആചാരവും അനുഷ്ഠാനവുമില്ലാത്തവര് ക്ഷേത്രചടങ്ങുകളില് കടന്നുകയറി കുഴപ്പങ്ങളുണ്ടാക്കുന്നത് വര്ധിച്ചുവരുന്ന ഭക്തജന വിശ്വാസത്തെ ഇല്ലാതാക്കാനും അതുവഴി ക്ഷേത്രപുരോഗതി തകര്ക്കാനുമാണെന്ന് ഭക്തജനങ്ങള് ആരോപിക്കുന്നു. ക്ഷേത്രവിശ്വാസത്തെ താറടിക്കാന് നിരന്തരം നീക്കം നടത്തുന്നതിനെതിരെ പ്രദേശത്ത് ശക്തമായ ഭക്തജന പ്രതിഷേധം ഉയര്ന്നിരിക്കുകയാണ്.
