പത്തനാപുരം: അടിസ്ഥാനസൗകര്യങ്ങള് ഒന്നുമില്ലാതെ വിളക്കുടി പഞ്ചായത്തിലെ തേക്കിന്മുകള് കോളനി നിവാസികള്. കുടിവെള്ളവും സഞ്ചാരയോഗ്യമായ പാതയും പോലുമില്ലാതെ ദുരിതത്തിലാണ് കോളനിയിലെ എണ്പതോളം കുടുംബങ്ങള്. വിളക്കുടി ഗ്രാമപഞ്ചായത്തിലെ പതിനാറാം വാര്ഡിലാണ് കോളനി സ്ഥിതി ചെയ്യുന്നത്. ജലക്ഷാമം രൂക്ഷമായ ഇവിടെ ദൂരസ്ഥലങ്ങളില് നിന്നും തലച്ചുമടായിട്ടാണ് വെള്ളമെത്തിക്കുന്നത്. പേരിന് വേണ്ടിയുള്ള പൈപ്പ്ലൈന് വഴി ആഴ്ചയില് രണ്ടുതവണ മാത്രമാണ് ജലവിതരണമുള്ളൂ. വിളക്കുടി ഗ്രാമപഞ്ചായത്തിലെ ഏറ്റവും ഉയര്ന്ന പ്രദേശങ്ങളിലൊന്നാണ് തേക്കിന്മുകള്. കോളനിക്ക് താഴ്ഭാഗത്ത് കൂടി കനാല് ഒഴുകുന്നുണ്ടെങ്കിലും കുന്നിന്മുകളിലെ കോളനിക്കാര്ക്ക് ഇതിന്റെ പ്രയോജനം ലഭിക്കില്ല. സ്വകാര്യവ്യക്തി വിട്ട് നല്കിയ സ്ഥലത്ത് കുളവും പമ്പ്ഹൗസും നിരപ്പുവിളയില് ടാങ്കും സ്ഥാപിച്ചിട്ടുണ്ട്. എന്നാല് പദ്ധതിയിലൂടെ കുടിവെള്ളം ലഭിച്ചിട്ട് വര്ഷങ്ങളായെന്ന് നാട്ടുകാര് പരാതിപ്പെടുന്നു. കെ.ബി.ഗണേഷ്കുമാര് എംഎല്എയുടെ പ്രാദേശികവികസന ഫണ്ടുപയോഗിച്ച് നിര്മ്മിച്ചതാണ് കുടിവെള്ളപദ്ധതി. വിളക്കുടി ഗ്രാമപഞ്ചായത്ത് ഓഫീസിന് എതിര്വശത്ത് കാണുന്ന കുന്നിലാണ് കോളനി സ്ഥിതി ചെയ്യുന്നത്. എങ്കിലും വീടുകളിലേക്ക് എത്തണമെങ്കില് തകര്ന്നുകിടക്കുന്ന പാതയാണ് ഏക ആശ്രയം. കോളനിയിലേക്ക് പഞ്ചായത്ത് കോണ്ക്രീറ്റ് റോഡ് നിര്മ്മിച്ചിട്ടുണ്ടെങ്കിലും ഫലപ്രദമല്ല. വെള്ളവും വഴിയുമില്ലാത്തതിനാല് മിക്ക കുടുംബങ്ങളും താമസം മാറിപ്പോയി. കൂലിപ്പണിക്ക് പോയി ഉപജീവനം നടത്തുന്ന കുടുംബാംഗങ്ങള്ക്ക് കുടിവെള്ളം ശേഖരിക്കാനായി മിക്കപ്പോഴും ജോലിക്ക് പോകാനാത്ത അവസ്ഥയിലാണ്. പട്ടികജാതിവിഭാഗങ്ങള് തിങ്ങിപ്പാര്ക്കുന്ന കോളനിയുടെ വികസനത്തിന് സമഗ്രപദ്ധതികള് ആസൂത്രണം ചെയ്ത് നടപ്പാക്കണമെന്നാണ് പ്രധാന ആവശ്യം.
അടിസ്ഥാനസൗകര്യങ്ങളില്ല; ദുരിതംപേറി തേക്കിന്മുകള് കോളനിവാസികള്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.