പോത്തന്കോട്: വെമ്പായം പഞ്ചായത്തിലെ വഴയ്ക്കാട് വനിതാ വ്യവസായ കേന്ദ്രം തുരുമ്പെടുത്ത് നശിക്കുന്നു. ഇരുപത് വര്ഷം മുമ്പ് വനിതകള്ക്ക് സ്വയം തൊഴില് ഉറപ്പാക്കുന്നതിന് വേണ്ടി ജില്ലാ പഞ്ചായത്ത് നിര്മ്മിച്ച വ്യവാസയകേന്ദ്രമാണ് നശിക്കുന്നത്. കറി പൗഡര് വിതരണം ചെയ്യാനായി ഇറക്കുമതിചെയ്ത ലക്ഷങ്ങള് വിലയുള്ള യന്ത്രങ്ങളെല്ലാം തുരുമ്പെടുത്ത് നശിച്ച് കഴിഞ്ഞു.
വലിയ യന്ത്രങ്ങള് ഉപയോഗിച്ച് പ്രവര്ത്തനം ആരംഭിച്ച വ്യവസായ കേന്ദ്രം കുറച്ച്നാള് കൊണ്ട് നഷ്ടത്തിലായി. സംരഭകര്ക്ക് താങ്ങാവുന്ന തരത്തിലുള്ള വ്യവസായത്തിനു വേണ്ടി ജില്ലാ പഞ്ചായത്ത് വീണ്ടും ചെറിയ യന്ത്രങ്ങള് ഇറക്കി. എന്നാല് അത് ഇതുവരെ സ്ഥാപിച്ചിട്ടുപോലുമില്ല. കുടിശ്ശിക കൂടിവൈദ്യുതി ബന്ധം വിശ്ചേദിച്ചതോടെ വ്യവസായ കേന്ദ്രം പൂര്ണ്ണമായും നിലച്ചു. ഗാന്ധി സ്മാരക നിധിയുടെ വക ഒരേക്കര് ഇരുപത് സെന്റ് വാങ്ങിയാണ് പഞ്ചായത്ത് വ്യവസായ കേന്ദ്രം തുടങ്ങിയത്. ഇപ്പോള് വ്യവസായ കേന്ദ്രത്തിന്റെ നാല് ചുറ്റും കാടുകയറി ഇഴജന്തുക്കളുടെ താവളമാണ്.പഴക്കം ചെന്ന് കെട്ടിടങ്ങള് ഏത് നിമഷവും നിലംപതിക്കാമെന്ന അവസ്ഥയിലാണ്. ഗ്രാമ പഞ്ചായത്ത് പ്രസിഡന്റിന്റെ പ്രദേശം കൂടിയായ വ്യവസായ കേന്ദ്രം ഗ്രാമപഞ്ചായത്തും ജില്ലാ പഞ്ചായത്തും കയ്യൊഴിഞ്ഞ അവസ്ഥയിലാണ്.
