കെ.ജി. രാധാകൃഷ്ണന്
ഗുരുവായൂര്: ഹരിനാമ കീര്ത്തനത്താല് പുളകചാര്ത്തണിഞ്ഞ വാതാലയേശന്റെ തിരുമുറ്റം ഭക്തിയുടെ നിറവില് ആനന്ദനൃത്തമാടിയപ്പോള്, തന്റെ പ്രജകളുടെ സന്തോഷം നേരില്കാണാനും, അവര്ക്ക് അനുഗ്രഹവര്ഷം ചൊരിയാനുമായി ഭഗവാന് ശ്രീഗുരുവായൂരപ്പന് ഇന്നലെ ഗ്രാമപ്രദക്ഷിണത്തിനായി പുറത്തേക്കിറങ്ങി. വൈകീട്ടത്തെ ദീപാരാധനക്ക് ശേഷം ആഞ്ചാനകളോടേയുള്ള എഴുന്നെള്ളിപ്പോടെ യുമാണ് പ്രജകളെ കാണാന് കണ്ണന് ഗ്രാമപ്രദക്ഷിണത്തിനായി പുറത്തിറങ്ങിയത്.
ഗ്രാമപ്രദക്ഷിണത്തിനായി പുറത്തേക്കിറങ്ങിയ ഭഗവാനെ കണ്ട് ഭക്തജനസഹസ്രം ആത്മസായൂജ്യമടഞ്ഞപ്പോള്, പുണ്യഭൂമിപോലും ആ ആത്മനിര്വൃതിയില് പുളകംകൊണ്ടു. ഇന്നലെയും, ഇന്നും ക്ഷേത്രം കൊടിമരത്തറക്ക് സമീപമാണ് ഭഗവാന് ദീപാരാധന. കൊടിമരതറയില് സ്വര്ണ്ണപഴുക്കാമണ്ഡപത്തിലെഴുന്നെള്ളിയ ഭഗവാനെ ഈ രണ്ടുദിവസങ്ങളിലും ക്ഷേത്രത്തില് ശാന്തിയേറ്റ കീഴ്ശാന്തിമാരാണ് ദീപാരാധന നടത്തുക.
ഇന്നലെ നടന്ന ദീപാരാധന ശാന്തിയേറ്റ കീഴ്ശാന്തി കീഴേടം രാമന്നമ്പൂതിരി നിര്വ്വഹിച്ചു. ദീപാരാധനക്ക് ശേഷം ഗുരുവായൂര് ദേവസ്വം ആനതറവാട്ടിലെ ഗജരാജന് വലിയകേശവന് പുറത്തേക്കെഴുന്നെള്ളുന്ന ഭഗവാന്റെ സ്വര്ണ്ണകോലത്തിലെഴുന്നെള്ളിയ തങ്കതിടമ്പേറ്റി. ദേവസ്വത്തിലെ തലയെടുപ്പുള്ള കൊമ്പന്മാരായ നന്ദന്, കളഭരത്നം വിഷ്ണു, ജൂനിയര് ദാമോദര്ദാസ് എന്നിവര് ഇടംവലം പറ്റാനകളായി. ഭക്തജന ങ്ങളുടെ നാരായണ മന്ത്രജപഘോഷത്താല് നാടും, നഗരവും നിറപറയും, കൊടിതോരണങ്ങളാലും കൊണ്ടും, വാദ്യകുലപതികളായ പെരുവനം കുട്ടന്മാരാര്, ചൊവ്വല്ലൂര് മോഹന് എന്നിവരുടെ മേളപ്രമാണത്തിലുള്ള ഭഗവാന്റെ പുറത്തേക്കെഴുന്നെള്ളിപ്പിനെ എതിരേറ്റു. ആയുധമേന്തിയ ദേവസ്വം കൃഷ്ണനാട്ടം കളരിയിലെ കലാകാരന്മാരുടെ വേഷവും ഗ്രാമപ്രദക്ഷിണത്തിന് അകമ്പടിയായി. ഗ്രാമപ്രദക്ഷിണത്തിന് ശേഷം ഭഗവാന് പള്ളിവേട്ടക്കിറങ്ങി. പക്ഷിമൃഗാദികളുടെ വേഷം കെട്ടിയ മൃഗങ്ങളെ വേട്ടയാടാനാണ് ഭഗവാന് പള്ളിവേട്ടക്ക് പോകുന്നതെന്നാണ് സങ്കല്പ്പം. പള്ളിവേട്ടക്ക് പിടിയാനപുറത്ത് ഭഗവാന്റെ തിടമ്പേറ്റി. പള്ളിവേട്ടകഴിഞ്ഞ് നമസ്ക്കാരമണ്ഡപത്തില് പ്രത്യേകം തയ്യാറാക്കിയ കട്ടിലിലായിരുന്നു, ഭഗവാന്റെ ഇന്നലത്തെ പള്ളിയുറക്കം. പള്ളിവേട്ടയുടെ ആലസ്യത്തില് കിടന്നുറങ്ങുന്ന ഭഗവാന്റെ ഉറക്കത്തിന് വിഘ്നം സംഭവിക്കാതിരിക്കാന് ക്ഷേത്രത്തിനകത്തെ നാഴികമണി ഇന്നലെ രാത്രി ചിലച്ചില്ല. വര്ഷത്തില് ഈ ദിവസം മാത്രമാണ് രാത്രി നാഴികമണി അടിക്കാതിരിക്കുന്നതും. ഇന്ന് രാവിലെ പശുകിടവിന്റെ കരച്ചില് കേട്ടാണ് ഭഗവാന് പള്ളിയുറക്കത്തില് നിന്നുമുണരുക. അതിനായി രാത്രി ക്ഷേത്രത്തിനകത്ത് പശുകിടാവിനെ തയ്യാറാക്കിനിര്ത്തിയിരുന്നു.
