ചാവക്കാട്: കടപ്പുറം മുനക്കക്കടവ് മേഖലയില് ദിവസങ്ങളായി കുടിവെള്ളം ലഭ്യമല്ലാത്തതിനെത്തുടര്ന്ന് ലോക വനിത ദിനത്തില് കടപ്പുറം ഗ്രാമ പഞ്ചായത്ത് സെക്രട്ടറിയെ മഹിളാമോര്ച്ച കടപ്പുറം പഞ്ചായത്ത് കമ്മിറ്റിയുടെ നേതൃത്ത്വത്തില് ഉപരോധിച്ചു.
പൈപ്പ് വഴി എത്തുന്ന കുടിവെള്ളം സാമൂഹ്യവിരുദ്ധര് സ്ഥിരമായി ഊറ്റിയെടുത്ത് മറിച്ച് വില്ക്കുന്നതിനെതിരെ ശക്തമായ നടപടികള് എടുക്കണമെന്നും കുടിവെള്ള ക്ഷാമം രൂക്ഷമായ മുനക്കക്കടവ്, തൊട്ടാപ്പ്, ബ്ലാങ്ങാട് മേഖലയിലേക്ക് അടിയന്തിരമായി കുടിവെള്ളം എത്തിക്കണമെന്നും ഈ മേഖലകളില് കുടിവെള്ളം ലഭ്യമാക്കാന് പഞ്ചായത്തിനു ലഭിച്ച 2 കോടി ലോകബാങ്ക് ഫണ്ട് ഉപയോഗിച്ച് പദ്ധതി തയ്യാറാക്കണമെന്നും ആവശ്യപ്പെട്ടായിരുന്നു ഉപരോധം.
മഹിളാമോര്ച്ച സംസ്ഥാന ജനറല് സെക്രട്ടറി അഡ്വ.സി.നിവേദിത, ബിജെപി പഞ്ചായത്ത് പ്രസിഡന്റ് എ .എസ്.രാജു, മിനി അനില്, ഗീതാ അശോകന്, പുഷ്പ തുടങ്ങിയവര് നേതൃത്വം നല്കി . 12 മണിക്ക് ആരംഭിച്ച ഉപരോധം 3 മണിയോടെ പൈപ്പിലൂടെ കുടിവെള്ളം ലഭ്യമായതിനാല് അവസാനിപ്പിച്ചു.
