വടക്കാഞ്ചേരി: ഊത്രാളിക്കാവ് പൂരത്തോടനുബന്ധിച്ച ദേശീയ പ്രദര്ശനത്തിന് തുടക്കമായി. വടക്കാഞ്ചേരി ഗവ. ഹയര് സെക്കന്ഡറി സ്കൂള് ഗ്രൗണ്ടില് നഗരസഭയുടെയും വിവിധ പൂരക്കമ്മിറ്റികളുടെയും സാംസ്കാരിക സംഘടനകളുടെയും നേതൃത്വത്തിലാണു പ്രദര്ശനം നടക്കുന്നത്.
ഐസ് വേള്ഡ്, ജൂറാസിക് ആന്ഡ് റോബോട്ടിക് എക്സിബിഷനാണു സംഘടിപ്പിക്കുന്നതെന്ന് പ്രദര്ശന കമ്മിറ്റി വര്ക്കിങ് ചെയര്പഴ്സനും നഗരസഭ അധ്യക്ഷയുമായ ശിവപ്രിയ സന്തോഷ്, ജനറല് കണ്വീനറും നഗരസഭ ഉപാധ്യക്ഷനുമായ എം.ആര്. അനൂപ്കിഷോര്, ചീഫ് കോ– ഓര്ഡിനേറ്ററും ബ്ലോക്ക് പഞ്ചായത്ത് പ്രസിഡന്റുമായ എസ്. ബസന്ത്ലാല്, വൈസ് ചെയര്പഴ്സനും ടൗണ് ഡിവിഷന് കൗണ്സിലറുമായ സിന്ധു സുബ്രഹ്മണ്യന് എന്നിവര് അറിയിച്ചു. പ്രദര്ശന നഗരിയില് സര്ക്കാര്, അര്ധസര്ക്കാര്, പൊതുമേഖലാ സ്ഥാപനങ്ങള് എന്നിവയുടെയും വ്യാപാരികളുടെയും കച്ചവട സ്റ്റാളുകള് ഉണ്ടായിരിക്കും.
കെഎസ്ഇബി, എക്സൈസ്, കാര്ഷിക സര്വകലാശാല, സ്റ്റുഡന്റ് പൊലീസ് എന്നിവയുടെ പവിലിയനുകളും വ്യവസായ വകുപ്പ്, കണ്സ്യൂമര്ഫെഡ്, ഖാദി, എന്ആര്എച്ച്എം, അനര്ട്ട്, മലിനീകരണ നിയന്ത്രണ ബോര്ഡ്, കയര് ബോര്ഡ്, ബിഎസ്എന്എല്, കുടുംബശ്രീ, ആയുര്വേദ വകുപ്പ്, ഫിഷറീസ്, ഫോറസ്റ്റ്, മല്സ്യഫെഡ് എന്നിവയുടെ സ്റ്റാളുകളും ഉണ്ടായിരിക്കും. വിനോദത്തിനായുള്ള അമ്യൂസ്മെന്റ് പാര്ക്കില് ത്രീഡി ഷോ, യന്ത്ര ഊഞ്ഞാല്, മെറി കപ്പ്, ഡ്രാഗണ് റയില്, റണ്ണിങ് ഫിഷ്, മെരിഗോ റൗണ്ട്, പിങ്കി ട്രെയിന്, വാട്ടര് ബോട്ട്, കമാന്റോ എന്നിവയും ഫുഡ്കോര്ട്ടില് വ്യത്യസ്തങ്ങളായ ഭക്ഷണ വിഭവങ്ങളും ഐസ്ക്രീം– ജ്യൂസ് പാര്ലറുകളും ഒരുക്കിയിട്ടുണ്ട്. മുതിര്ന്നവര്ക്കുള്ള പ്രവേശന ടിക്കറ്റിന് 20 രൂപയും കുട്ടികള്ക്കു 10 രൂപയുമാണു നിരക്ക്.
വിദ്യാര്ഥികള്ക്കു സൗജന്യ ടിക്കറ്റുകള് വിതരണം ചെയ്യും. വൈകിട്ട് കലാ പരിപാടികള്, ഹെല്ത്ത് ക്യാംപ്, പരിശീലന പരിപാടികള്, സെമിനാറുകള് എന്നിവയും ഉണ്ടായിരിക്കും. ചലച്ചിത്ര താരം രചന നാരായണന്കുട്ടിയുടെ നൃത്തമയൂഖം, ജയരാജ് വാരിയരുടെ പരിപാടി, പൊലീസ് ഓര്ക്കസ്ട്ര, തായമ്പക, സലിം കോടത്തൂരിന്റെ മാപ്പിള ഗാനമേള, ഡിജെ മ്യൂസിക്, കളിയരങ്ങിന്റെ നാടന്പാട്ടുകള്, ആറങ്ങോട്ടുകര കലാപാഠശാലയുടെ കളികൗതുകങ്ങളും നാടകവും, മണലൂര് ഗോപിനാഥിന്റെ ഓട്ടന്തുള്ളല്, സിനിമാറ്റിക് ഡാന്സ്, ഗോത്ര നൃത്തരൂപമായ മംഗലംകളി, ഒപ്പന, സ്വനത്തിന്റെ ഗാനമേള, തെയ്യം കലാകാരന്മാരുടെ ആദിസ്വത്വം, ഗോത്രകലയായ അട്ടപ്പാടിയുടെ ഇരുളനൃത്തം, ജിഐഎഫ്ഡിയുടെ ഫാഷന്ഷോ, വയലിയുടെ ബാംബൂ ഓര്ക്കസ്ട്ര, കലാമണ്ഡലം അരങ്ങുകള്, ഞെരളത്ത് ഹരിഗോവിന്ദന്റെ സോപാന സംഗീതം, വിവിധ ഗാനമേളകള് എന്നിവയും അരങ്ങേറും. കുടുംബശ്രീകള്ക്കായി തിരുവാതിരകളി മല്സരം, ഊത്രാളിക്കാവ് പൂരം ഫോട്ടോഗ്രഫി മല്സരം, നാട്ടരങ്ങുകള് എന്നിവയും ഉണ്ടായിരിക്കും. പ്രദര്ശനം മാര്ച്ച് ഒന്നിനു സമാപിക്കും.
പ്രതികരിക്കാൻ ഇവിടെ എഴുതുക: