രാമപുരം: മെയിന് റോഡില് ടൗണില് സ്ഥിതിചെയ്യുന്ന ബിവറേജസ് കോര്പ്പറേഷന്റെ ഷോപ്പ് നിരന്തരമായി അപകട ഭീഷണി ഉയര്ത്തുന്നതിനാല് അവിടെനിന്നും മാറ്റണമെന്ന ആവശ്യം ശക്തമാകുന്നു.
പോലീസ് സ്റ്റേഷന് സമീപത്താണ് ബീവറേജസ് ഷോപ്പ്. പാലാ-കൂത്താട്ടുകുളം മെയിന് റോഡായതിനാല് ആയിരക്കണക്കിന് വാഹ്നങ്ങളാണ് ഇതുവഴി കടന്നുപോകുന്നത്. ബിവറേജസിലേയ്ക്ക് വരുന്ന ആളുകള് റോഡിന് കുറുകെ ചാടുന്നത് ഇവിടെ സ്ഥിരം അപകടസാധ്യത ഉണ്ടാക്കുന്നു. വൈകുന്നേര സമയങ്ങളില് ബിവറേജസിലെ ക്യൂ ഗതാഗത കുരുക്കിനും കാരണമാകുന്നു.
ശബരിമല തീര്ത്ഥാടകര് യാത്രചെയ്യുന്ന പ്രധാന റോഡാണിത് സീസണാകുന്നതോടെ കേരളത്തിന്റെ വടക്കന് ജില്ലകളില് നിന്നുള്ളവര് പ്രധാനമായും ആശ്രയിക്കുന്നത് ഈ റോഡ് ആയതിനാല് വന് തിരക്കാണ് അനുഭവപ്പെടുന്നത്. നാലമ്പല തീര്ത്ഥാടക കാലമായതിനാല് കര്ക്കിടക മാസത്തിലും സ്ഥിതി രൂക്ഷമാണ്. വഴ്ത്തപ്പെട്ട കുഞ്ഞച്ചന്റെ കബറിടത്തിങ്കലേയ്ക്കും ധാരാളം വാഹ്നങ്ങള് എത്തിക്കൊണ്ടിരിക്കുന്നത് ഇതുവഴിയാണ്.
കാല് നടയാത്രക്കാര്ക്കും, വാഹനയാത്രക്കാര്ക്കും ഒരുപോലെ ബുദ്ധിമുട്ടിയതോടെ ബിവറേജസ് ഷോപ്പ് ടൗണിന്റെ പ്രധാന ഭാഗത്തുനിന്നും സൗകര്യപ്രദമായ സ്ഥലത്തേയ്ക്ക് മാറ്റണമെന്ന നാട്ടുകാരുടെ ആവശ്യം ശക്തമായിരിക്കുകയാണ്. ജനങ്ങളുടെ ശക്തമായ എതിര്പ്പിനെ തുടര്ന്ന് രണ്ട് വര്ഷം മുന്പ് ഇത് പാലവേലിയിലേയ്ക്ക് മാറ്റുവാന് ശ്രമങ്ങള് നടന്നിരുന്നെങ്കിലും പിന്നീട് ചില രാഷ്ട്രീയ ഇടപെടലുകളെ തുടര്ന്ന് വേണ്ടെന്നു വെയ്ക്കുകയായിരുന്നു.
ബിവറേജസ് ഷോപ്പ് ഉടന് മാറ്റിയില്ലെങ്കില് ശക്തമായ സമരപരിപാടികള് ആരംഭിക്കാനുള്ള തീരുമാനത്തിലാണ് നാട്ടുകാര്.
