മാനന്തവാടി ബ്ലോക്ക് പഞ്ചായത്ത് പ്രസിഡണ്ട് രാജിവെക്കണം- യുവമോർച്ച

കൽപ്പറ്റ: 2015-16 സാമ്പത്തിക വർഷത്തെ പട്ടികവർഗ്ഗ വിദ്യാർത്ഥികളുടെ എൻട്രൻസ് കോച്ചിങ്ങിന് വേണ്ടി അനുവദിച്ച ഫണ്ടിൽ ലക്ഷങ്ങളുടെ അഴിമതി നടത്തിയ മാനന്തവാടി ബ്ലോക്ക് പഞ്ചായത്ത് പ്രസിഡണ്ട് രാജിവെക്കണമെന്ന് യുവമോർച്ച ജില്ലാ കമ്മിറ്റി ആവശ്യപ്പെട്ടു. ലക്ഷങ്ങളുടെ അഴിമതിയാണ് ഈ പദ്ധതിയിൽ ബ്ലോക്ക് പഞ്ചായത്ത് ഭരണസമിതി നടത്തിയിരിക്കുന്നത്. പദ്ധതിയിൽ അഴിമതി നടത്തിയതിന്റെ പേരിൽ വിജിലൻസ് ബ്ലോക്ക് പഞ്ചായത്ത് പ്രസിഡണ്ടിനെ രണ്ടാം പ്രതിയാക്കി കേസ് രജിസ്റ്റർ ചെയ്തിട്ടുണ്ട്. ഈ സാഹചര്യത്തിൽ തൽസ്ഥാനത്ത് ഒരു നിമിഷം പോലും തുടരാൻ പ്രസിഡണ്ടിന് യോഗ്യതയില്ല .ഇത് കൂടാതെ തൊണ്ടർനാട് പാക്കേജ് പദ്ധതിയിൽ ഇല്ലാത്ത സംഘടനയുടെ പേരിൽ ഫണ്ട് നൽകാൻ ശുപാർശ ചെയ്തിരിക്കുന്നതും ബ്ലോക്ക് പഞ്ചായത്ത് പ്രസിഡണ്ടാണ്. മാനന്തവാടി ബ്ലോക്ക് പഞ്ചായത്ത് ഭരണസമിതി അഴിമതിക്കാരുടെ കൂടാരമായി മാറിയിരിക്കുകയാണെന്നും യോഗം കുറ്റപ്പെടുത്തി. ജില്ല പ്രസിഡണ്ട് അഖിൽ പ്രേം .സി അധ്യക്ഷത വഹിച്ചു. ജിതിൻ ഭാനു, പ്രശാന്ത് മലവയൽ തുടങ്ങിയവർ സംസാരിച്ചു.