കോട്ടയം: വിദേശത്ത് ജോലി വാഗ്ദാനം ചെയ്ത് പണം തട്ടിയെന്ന പരാതിയില് നടപടി സ്വീകരിച്ചില്ലെന്ന് പരാതിക്കാരി. കാഞ്ഞിരപ്പള്ളി പട്ടിമറ്റം സ്വദേശി നൗഫലിനെതിരെ കുറവിലങ്ങാട് പുള്ളോട് വീട്ടില് രാധാമണിയാണ് പരാതി നല്കിയിരിക്കുന്നത്. മകന് വിദേശത്ത് പഴക്കടയില് ജോലി വാഗ്ദാനം ചെയ്തായിരുന്നു തട്ടിപ്പ്. രണ്ടു തവണ ജില്ലാ പൊലിസ് മേധാവിക്ക് പരാതി നല്കിയെങ്കിലും നീതിലഭിച്ചില്ലെന്ന് വീട്ടമ്മ പത്രസമ്മേളനത്തില് പറഞ്ഞു.
കേസ് അന്വേഷിച്ച കാഞ്ഞിരപ്പള്ളി സിഐ തട്ടിപ്പുകാരന് അനുകൂലമായ നടപടി സ്വീകരിച്ചെന്നാണ് പരാതി. ഭര്ത്താവും മൂത്ത മകനും നഷ്ടപ്പെട്ട രാധാമണിയുടെ ഏക ആശ്രയം ഇളയ മകനായിരുന്നു. മകന്റെ അടുത്ത സുഹൃത്തായി മാറിയ നൗഫല് ഗള്ഫില് പോയി തിരിച്ചെത്തിയ ശേഷം രാധാമണിയുടെ മകനെയും ഗള്ഫില് കൊണ്ടുപോകാമെന്ന് വാക്കു കൊടുത്തു.ചിലവിനായി ഒരുലക്ഷം രൂപ നൗഫലിന് നല്കിയെന്ന് വീട്ടമ്മ പറയുന്നു. ജോലി ലഭിക്കാത്തതിനെ തുടര്ന്ന് തിരികെ പണം ആവശ്യപ്പെട്ടപ്പോള് ഒഴിഞ്ഞു മാറി. എസ്.പിയുടെ നിര്ദേശമനുസരിച്ച് കാഞ്ഞിരപ്പള്ളി സി.ഐ കേസ് അന്വേഷിക്കുകയും കഴിഞ്ഞ ഡിസംബര് 30 നുള്ളില് പണം തിരികെ നല്കാമെന്ന് നൗഫല് സി.ഐ്ക്കു മുന്പാകെ ഉറപ്പു നല്കി. എന്നാല് ഡിസംബര് കഴിഞ്ഞിട്ടും പണം ലഭിക്കാതായതോടെ രാധാമണി വീണ്ടും സ്റ്റേഷനില് കാര്യം പറഞ്ഞപ്പോള് സി.ഐ പ്രതികരണം പ്രതിക്കനുകൂലമായിട്ടായിരുന്നുവെന്ന് രാധാമണി പറഞ്ഞു. നൗഫല് ഇതിനുമുന്പും മറ്റൊരാളെ കബിളിപ്പിച്ചിട്ടുണ്ടെന്നും വീട്ടമ്മ വ്യക്തമാക്കി. ജോലി വാഗ്ദാനം നല്കി ഒരു സ്ത്രീയുടെ കയ്യില് നിന്ന് എണ്പതിനായിരം രൂപ വാങ്ങിയതായാണ് വീട്ടമ്മ പറയുന്നത്.
