പന്തീരാങ്കാവ്: ശ്രീമംഗള സഹസ്രചണ്ഡീമഹായാഗത്തിന് ഇന്ന് ഗണേശസാധനാകേന്ദ്രത്തില് തുടക്കമാകും.
ഇന്ന് പുലര്ച്ചെ അഞ്ചിന് യാഗത്തിന് അഗ്നി ജ്വലിപ്പിക്കും. ബാലഗണപതിഹോമത്തോടെയാണ് യാഗ കര്മ്മങ്ങള് ആരംഭിക്കുക. വേദപാരായണം, മഹാഗണപതിപൂജ, മഹാസങ്കല്പ്പം, പുണ്യാഹവാചനം, പുസ്തകപൂജ, ഗ്രഹപ്രീതി, ദ്വാപരപൂജ, വേദികാര്ച്ചന, കലശപൂജ, ആവരണ അര്ച്ചന, ശ്രീദുര്ഗ്ഗാസപ്തശതീ പാരായണം, ശ്രീചക്ര നവാവരണപൂജ, മഹാദീപാരാധന, അമൃതഭോജനം, മഹാഗണപതി ആവരണ പൂജ, ശ്രീഏകപഞ്ചാശത് ഗണപതിമൂലമന്ത്രഹോമം, പൂര്ണ്ണാഹുതി, മഹാദീപാരാധന എന്നിവയുണ്ടാകും.
രാവിലെ 10 ന് ജഗദ്ഗുരു ശങ്കരാചാര്യ കേശവാനന്ദ ഭാരതി സ്വാമികള് ധ്വജാരോഹണം നടത്തും. ആഴ്വാഞ്ചേരി കൃഷ്ണന് തമ്പ്രാക്കള്, സാമൂതിരി ഉണ്ണി അനുജന് രാജ തുടങ്ങിയവര് സന്നിഹിതരാവും. വൈകുന്നേരം അഞ്ച് മണിക്ക് നടക്കുന്ന സാംസ്ക്കാരിക സമ്മേളനം കേന്ദ്ര മന്ത്രി ഗിരിരാജ് സിംഗ് ഉദ്ഘാടനം ചെയ്യും.
കൊളത്തൂര് അദൈ്വതാശ്രമം മഠാധിപതി സ്വാമി ചിദാനന്ദപുരിക്ക് ചടങ്ങില്വെച്ച് ഗണേശസാധനാ കേന്ദ്രം നല്കുന്ന യതീയാജ്ഞവല്ക്യ പുരസ്കാരം സമര്പ്പിക്കും. ആര്എസ്എസ് പ്രാന്തകാര്യവാഹ് പി. ഗോപാലന്കുട്ടി മാസ്റ്റര്, സ്വാമി അമൃതകൃപാനന്ദപുരി, ബ്രഹ്മചാരി മുകുന്ദചൈതന്യ, പാലാഞ്ചേരി സുബ്രഹ്മണ്യന് നമ്പൂതിരി, കുറ്റിയാട്ട് ഇല്ലത്ത് വാസുദേവന് നമ്പൂതിരി, അഡ്വ. ഗോവിന്ദ് കെ. ഭരതന്, ഡോ. കെ.എസ്. ചന്ദ്രകാന്ത്, ഡോ. കെ.എം. പ്രിയദര്ശന്ലാല് തുടങ്ങിയവര് ചടങ്ങില് പങ്കെടുക്കും.
ശ്രീമംഗള സഹസ്ര ചണ്ഡീ മഹായാഗത്തിന്റെ ഭാഗമായി ഇന്നലെ അറപ്പുഴ ആറാട്ടുകടവില് യജ്ഞാചാര്യന് സ്വാമി പ്രണവാനന്ദ സരസ്വത്യവധൂതയുടെ നേതൃത്വത്തില് നദീപൂജ നടന്നു. തുടര്ന്ന് ആറാട്ടുകടവില് നിന്നും 27 നക്ഷത്രമായി സങ്കല്പ്പിച്ച 27 കുടം കലശവുമേന്തി വാദ്യമേളങ്ങളോടുകൂടിയുള്ള ഘോഷയാത്ര പന്തീരാങ്കാവ് നഗരവീഥിയെ ഭക്തിസാന്ദ്രമാക്കി യാഗശാലയില് സമാപിച്ചു. ആന, കുരിത, പശു എന്നിവയെ പൂജിച്ച് സഹസ്ര ചണ്ഡികാദേവിയിലര്പ്പിച്ച് പൂജ നടന്നു. നൂറുകണക്കിന് ഭക്തര് ഘോഷയാത്രയില് പങ്കെടുത്തു. വൈകിട്ട് ആറ് മുതല് 8.30 വരെ വേദ പ്രാര്ത്ഥന, ഗണേശപൂജ, വാസ്തുശാന്തി, അങ്കുരാര്പ്പണം, രക്ഷാബന്ധനം, മഹാദീപാരാധന എന്നിവയും നടന്നു.
കേരളത്തിനകത്തും പുറത്തുനിന്നുമുള്ള 130 ല് പരം ആചാര്യ ശ്രേഷ്ഠന്മാര് യാഗത്തില് പങ്കെടുക്കും. നിരവധി സംന്യാസിശ്രേഷ്ഠന്മാരും ആദ്ധ്യാത്മിക സാംസ്ക്കാരിക നേതാക്കളും വിവിധ ദിവസങ്ങളിലായി നടക്കുന്ന സാംസ്കാരിക സദസ്സില് പങ്കെടുക്കും.
മഹായാഗം ദര്ശിക്കാനും വിവിധ വഴിപാടുകള്ക്കുമായി എത്തുന്നവര്ക്കായി വിപുലമായ സംവിധാനങ്ങളാണ് ഗണേശ സാധനാ കേന്ദ്രത്തില് ഒരുക്കിയിരിക്കുന്നത്.
