തിരുവല്ല: ഗുഡ്സ് യാര്ഡില് സിമിന്റ് പൊടി വ്യാപിക്കുന്നുവെന്ന് ആരോപണം റെയില്വേ അധികൃതര് തള്ളി.കോടതിയും മലിനീകരണ നിയന്ത്രണ ബോര്ഡും നല്കിയ നിര്ദേശങ്ങള് പൂര്ണ്ണമായും പാലിച്ചാണ് യാര്ഡ് പ്രവര്ത്തിക്കുന്നതെന്നും മറിച്ച് പുറത്തുവരുന്ന വര്ത്തകള് സ്റ്റേഷന് വികസനം അട്ടിമറിക്കുന്നതിന്റെ ഭാഗമായി നടക്കുന്ന കുപ്രചരണങ്ങളുടെ ഭാഗമാണെമന്നും റെയില്വേ വ്യക്തമാക്കി. പാതയിരട്ടിപ്പിക്കലിന്റെ ഭാഗമായി 2015 മാര്ച്ചില് നിര്ത്തിവെച്ച യാര്ഡിന്റെ പ്രവര്ത്തനം പുനരാരംഭിക്കുക മാത്രമാണ് ചെയ്തിട്ടുളളതെന്നും അധികൃതര് അറിയിച്ചു. ജില്ലയിലെ തലമുതിര്ന്ന നേതാവും രാജ്യസഭാ ഉപാധ്യക്ഷനുമായി പ്രഫ: പി.ജെ കുര്യന്റെ അടുത്ത ബന്ധു അടക്കം മൂന്ന് പേരുടെ ഭൂമി മാത്രമാണ് നാലാം പ്ലാറ്റ്ഫോമിന്റെ സമീപത്തായി ഉളളത്.
യാര്ഡിന്റെ പ്രവര്ത്തനം ചങ്ങനാശേരിയിലേക്ക് മാറ്റണമെന്ന് ആവശ്യപ്പെട്ട് കഴിഞ്ഞ ദിവസം രാജ്യസഭാ ഉപാധ്യക്ഷന് നേരിട്ട് റെയില്വേ ഡിവിഷണല് മാനേജരെ വിളിച്ചതിന് പിന്നിലും ഇത്തരം വ്യക്തി താല്പര്യങ്ങള് ഒളിഞ്ഞു കിടക്കുന്നതായാണ് പറയപ്പെടുന്നത്. സിമിന്റ് ഇറക്കുന്നതിന് മുമ്പും ശേഷവും പ്ലാറ്റ് ഫോം നന്നായി നനയ്ക്കണമെന്നും സിമന്റ് കൊണ്ടുപോകുന്ന ലോറികള് പോളിത്തീന് കവര് ഉപയോഗിച്ച് മൂടിക്കെട്ടണമെന്നുമാണ് മലിനീകരണ നിയന്ത്രണ ബോര്ഡ് മുന്നോട്ട് വെച്ച നിര്ദേശം. ഇത് പാലിച്ചുളള പ്രവര്ത്തനം മാത്രമാണ് യാര്ഡില് നടക്കുന്നതെന്ന് റെയില്വേ അധികൃതര് അറിയിച്ചു. ജില്ലയിലെ നിര്മാണ പ്രവര്ത്തനങ്ങള്ക്ക് ആവശ്യമുളള സിമിന്റുമായി 42 വാഗണുകളാണ് കഴിഞ്ഞ രണ്ട് ദിവസങ്ങളിലായി നാലാം ട്രാക്കിലെ യാര്ഡില് എത്തിയത്. ഇതില് നിന്ന് 31500 രൂപയുടെ അധിക വരുമാനം സ്റ്റേഷന് ലഭിച്ചതായും കണക്കുകള് വ്യക്തമാക്കുന്നു. അടുത്ത മാസത്തോടെ ജില്ലയിലേക്കുളള റേഷന് വിതരണത്തിനടക്കമുളള അരിയും ഗോമ്പും മറ്റ് ഭക്ഷ്യോല്പ്പന്നങ്ങളും യാര്ഡില് എത്തിത്തുടങ്ങും. ഇതോടെ സ്റ്റേഷന്റെ വരുമാനത്തിലും കാര്യമായ വര്ദ്ധനയുണ്ടാകും. നിലവില് എക്ലാസ് സ്റ്റേഷനായ തിരുവല്ല എ വണ് തലത്തിലേക്ക് ഉയര്ത്തപ്പെടുന്നതോടൊപ്പം എല്ലാ ട്രയിനുകള്ക്കും സ്റ്റോപ്പ് അനുവദിക്കാനും ഇത് സഹായകരമാകും. നിലവില് 90 തൊഴിലാളികളാണ് യാര്ഡില് ജോലി ചെയ്യുന്നത്. യാര്ഡിന്റെ പ്രവര്ത്തനം പൂര്ണ്ണ സജ്ജമാകുന്നതോടെ കൂടുതല് പേര്ക്ക് തൊഴില് ലഭിക്കുമെന്നതാണ് ട്രേഡ് യൂണിയന് നേതാക്കളുടെ അഭിപ്രായം. 42 വാഗണുകള് ഒന്നിച്ച് എത്താനുളള ക്രമീകരണം സ്റ്റേഷനില് ഒരുക്കിയാല് മാത്രമേ പഞ്ചാബ് അടക്കമുളള സംസ്ഥാനങ്ങളില് നിന്നും ജില്ലയ്ക്ക് ആവശ്യമായ ഭക്ഷ്യോല്പ്പന്നങ്ങള് പൂര്ണ്ണമായും എത്തിക്കാന് സാധിക്കു. ഇങ്ങനെ എത്തുന്ന ഉല്പ്പന്നങ്ങള് കൊണ്ടുപോകുന്നതിന് കൂടുതല് ചരക്ക് ലോറികള്ക്ക് ഒരേസമയം പാര്ക്കിംഗ് ഏര്പ്പെടുത്തേണ്ടതായും വരും. സ്റ്റേഷന് വികസനത്തിന് വഴിമുടക്കികളായി നില്ക്കുന്ന ചില തല്പ്പര കക്ഷികളാണ് യാര്ഡിനെതിരെയുളള വ്യജ പ്രചരണത്തിന് പിന്നിലെന്നാണ് ഉയരുന്ന പ്രധാന ആരോപണം.
