കാഞ്ഞങ്ങാട്: മൂവാരിക്കുണ്ട് പ്രദേശത്ത് നിന്ന് ബിജെപി പ്രവര്‍ത്തകര്‍ രാജിവെച്ച് സിപിഎമ്മില്‍ ചേര്‍ന്നുവെന്ന വ്യാജ പ്രചരണം നടത്തി സിപിഎം അപഹാസ്യരായിരിക്കുകയാണെന്ന് ബിജെപി കാഞ്ഞങ്ങാട് മുനിസിപ്പല്‍ കമ്മറ്റി യോഗം പ്രസ്താവനയില്‍ പറഞ്ഞു.
ജില്ലയില്‍ പല ഭാഗത്തു നിന്നും സിപിഎം അണികള്‍ രാജിവെച്ച് ബിജെപിയിലേക്കും, മറ്റ് രാഷ്‌ട്രീയ പ്രസ്ഥാനങ്ങളിലേക്കും ചേക്കേറുമ്പോള്‍ അതിനെ പ്രതിരോധിക്കാന്‍ കഴിയാത്ത സിപിഎം സ്വന്തം കാലിനടിയിലെ മണ്ണൊഴുക്ക് തടയാന്‍ കഴിയാതെ ബിജെപിയില്‍ നിന്നും പ്രവര്‍ത്തകര്‍ രാജിവെച്ചെന്ന വ്യാജ പ്രചരണം നടത്തി സ്വയം ആശ്വാസം കണ്ടെത്താന്‍ ശ്രമിക്കുന്ന ദയനീയമായ കാഴ്ചയാണ് മൂവാരിക്കുണ്ട് സ്വീകരണ സമ്മേളനത്തിലൂടെ പ്രകടമാക്കിയിട്ടുള്ളത്.
മത തീവ്രവാദ സംഘടനകളില്‍ ഉള്‍പ്പെട്ട ഏതാനും പേരെ പാര്‍ട്ടിയിലേക്ക് സ്വാഗതം ചെയ്തു കൊണ്ട് സിപിഎം നടത്തിയ നെറികെട്ട രാഷ്‌ട്രീയ പ്രവര്‍ത്തനത്തിന് മറപിടിക്കാന്‍ വേണ്ടിയാണ് ബിജെപിയുടെ പേരും കൂടി ഈ കൂട്ടത്തില്‍ ചേര്‍ത്തതെന്നും ഇത്തരം കപട നാടകങ്ങളിലൂടെ ജനങ്ങളുടെ മനസ്സില്‍ ഇടം നേടാമെന്ന് വ്യാമോഹിക്കുന്ന സിപിഎം നേതൃത്വം വിഡ്ഡികളുടെ സ്വര്‍ഗ്ഗത്തിലാണ് നിലയുറപ്പിച്ചിട്ടുള്ളതെന്നും പ്രസ്താവനയില്‍ പറഞ്ഞു. യോഗത്തില്‍ മുനിസിപ്പല്‍ പ്രസിഡന്റ് ശോഭന്‍ ഭക്ത അധ്യക്ഷത വഹിച്ചു. മണ്ഡലം വൈസ് പ്രസിഡന്റ് സി.കെ.വത്സലന്‍, മുനിസിപ്പല്‍ ജനറല്‍ സെക്രട്ടറി ഉണ്ണികൃഷ്ണന്‍ കല്ല്യാണ്‍റോഡ് എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: